Një ngjarje e rëndë ka tronditur të shtunën pasdite fshatin Fushticë e Poshtme në Drenas, ku një person ka humbur jetën si pasojë e një të shtëne me armë zjarri. Fillimisht, policia njoftoi se viktima kishte ndërruar jetë si pasojë e plagëve, por në raportin 24-orësh, rasti është cilësuar si “vrasje”, duke dhënë detaje të reja mbi ngjarjen.
Sipas raportit, ngjarja ka ndodhur më 01.11.2025 rreth orës 13:35, dhe një i dyshuar mashkull kosovar është arrestuar nën dyshimin se ka qëlluar me armë zjarri ndaj viktimës, gjithashtu mashkull kosovar.
Në vendin e ngjarjes, policia ka sekuestruar një pistoletë, një gëzhojë dhe një fishek, që dyshohet të jenë përdorur gjatë incidentit.
“Me vendim të prokurorit, i dyshuari është dërguar në mbajtje, ndërsa trupi i pajetë i viktimës është dërguar në IML për kontroll,” njofton raporti policor.
