Kuvendi është përfshirë në përplasje të forta lidhur me mënyrën e raportimit të drejtuesve të institucioneve të drejtësisë, veçanërisht kreut të SPAK, Altin Dumani.
Mazhoranca ka propozuar që pyetjet të dorëzohen me shkrim përpara seancës, ndërsa opozita kërkon të ruajë të drejtën për pyetje me gojë pas raportimeve.
Në një deklaratë jashtë Kuvendit, Berisha akuzoi Taulant Ballën për “heqjen e maskës” dhe për përpjekje për të kufizuar të drejtën e opozitës për të bërë pyetje me gojë gjatë seancave parlamentare.
“Taulant Bego Jaris hoqi maskën dhe u tha shqiptarëve se do bëjë takim me kryetarët e grupeve, duke u ofruar si alternativë: ose hiqni dorë nga pyetjet me gojë, ose do votohen pa lexim. Në këtë propozim ka skenarin e kyçjes së parlamentit. Nuk ka opozitë në botë që të pranojë një pazar të tillë. Nëse do t’i vësh kyçin, vërja që nesër.”- tha Berisha.
Berisha theksoi se gjatë viteve 2023–2024, pyetjet në Kuvend kanë qenë të gjitha me gojë, dhe çdo ndryshim në këtë drejtim është një manovër politike për të shmangur transparencën dhe përballjen me opozitën.
Ai akuzoi mazhorancën se po vepron në frikë dhe në kompromis me drejtuesit e institucioneve që duhet të raportojnë para Kuvendit, duke shtuar se:
“Opozitës nuk mund t’i imponosh kurrë. Këta janë në frikë dhe tmerr.” – tha ai ndër të tjera.
