Qeveria e re e Japonisë është përpjekur me çdo mënyrë të ndërtojë marrëdhënie miqësore me Donald Trump, teksa presidenti amerikan mbërriti sot në Tokio.
Sipas rrjetit NHK, Ministria japoneze e Transportit planifikon ta mirëpresë Trumpin me një ekspozitë të kamionëve të mëdhenj amerikanë (pick-up trucks), një referencë e qartë ndaj ankesës së shprehur nga presidenti amerikan se Japonia lejon importin e shumë pak makinave të prodhimit amerikan.
NHK raportoi se kamionët do të vendosen në zonën ku nesër do të mbahet samiti me kryeministren e re ultrakonservatore të Japonisë, Sanae Takaichi, e cila u zgjodh nga parlamenti më 20 tetor.
Sipas të njëjtit burim, Takaichi po shqyrton mundësinë t’i dhurojë Trumpit një shkop golfi që dikur përdorej nga i ndjeri ish-kryeministër Shinzo Abe, së bashku me topa golfi të veshur me fletë ari.
Takaichi konsiderohet si e mbrojtura politike e Abes, i cili u vra në vitin 2022.
Ajo ndan të njëjtat pikëpamje nacionaliste dhe reformiste me të dhe pritet të përfitojë nga miqësia e ngushtë që Abe kishte me Trumpin.
Trump, i cili e ka vizituar Japoninë tre herë gjatë mandatit të tij të parë, shpesh luante golf me Abën dhe të dy kishin ndjekur bashkë edhe ndeshje sumo.
