Nga Boldnews.al
Shoqëria “Kupa” shpk, një prej subjekteve që ka fituar më shumë tendera publikë në fushën e ndërtimit, ndalohet të marrë pjesë në procedurat e prokurimit publik për 4 muaj.
Agjencia e Prokurimit Publik (APP), ka konstatuar se kompania në pronësi të sipërmarrësit Shkëlqim Kupa, ka paraqitur të dhëna të pavërteta për t’u kualifikuar në një tender të zhvilluar në maj të vitit 2025 nga Agjencia e Shërbimeve Publike Rurale në Elbasan.
Sipas dokumentit të konsultuar nga “Boldnews.al”, tenderi penalizues kishte për objekt “Blerje Asfalto-Beton”, me fond limit rreth 2.5 milionë lekë të reja ose rreth 25 mijë euro.
Në atë tender, kompania “Kupa” shpk ishte konkurente e vetme, pasi nuk kishte asnjë shoqëri tjetër që ishte e interesuar. Por, edhe pse e vetme në garë, “Kupa” shpk sërish rezulton që të ketë paraqitur dokumenta të pavërteta, mbi bazën e të cilës u shpall edhe fituese.
Vendimi për përjashtim
Agjencia e Prokurimit Publik (APP), ka miratuar në 23 Tetor 2025 vendimin nr. 68, ku është vendosur “Përjashtimi i subjektit Kupa shpk nga e drejta për të fituar kontrata publike për 4 muaj”.
APP ka nisur hetimin administrativ mbi tenderin e zhvilluar nga Agjencia e Shërbimeve Rurale Elbasan në 5 Gusht 2025, bazuar në një informacion që i është përcjellë nga Inspektorati Shtetëror i Punës.
Në përfundim të verifikimeve, Agjencia e Prokurimit Publik ka konstatuar se shoqëria “Kupa” shpk e Shkëlqim Kupës “ka keqinformuar për qëllime kualifikimi në procedurën tenderuese”.
Vendimi i përjashtimit nuk ka paraqitur të dhëna të detajuara mbi shkeljet e kryera nga “Kupa” shpk. Megjithatë, referuar faktit se informacioni është përcjellë nga Inspektorati Shtetëror i Punës, besohet se shkelja ka lidhje me punësimin e stafit që ka deklaruar kompania private në dokumentacionin për pjesëmarrje në tender.
Miliardat publike për “Kupa” shpk
Vendimi i APP-së për përjashtimin e “Kupa” shpk nga tenderat përbën një minus të madh në imazhin e shoqërisë së Shkëlqim Kupës, e cila rezulton si një ndër përfitueset më të mëdha në procedurat e prokurimit publik.
Portali informativ “spending.albania”, i specializuar për përpunimin e të dhënave të Thesarit të Shtetit, llogarit se “Kupa” shpk ka përfituar mbi 40 milionë euro (mbi 40 miliardë lekë të vjetra) nga tenderat publikë gjatë 5 viteve të fundit.
Shuma e parave publike të përfituara nga “Kupa” shpk është akoma më e madhe, duke mbajtur në konsideratë se ajo në aktivitet prej vitit 2005.
“Kupa” shpk është krijuar nga Qemal Kupa. Sipas të dhënave të konsultuara nga “Boldnews.al” në faqen e internetit të Qendrës Kombëtare të Biznesit (QKB), rezulton se ortaku themelues ia ka dhuruar të gjithë aksionet në vitin 2009, djalit të tij, Shkëlqim Kupa.
Kompania me seli në zonën e Kamzës, në Tiranë, rezulton fituese në dhjetra tendera me vlera të larta, ku ka marrë pjesë si ofertues i vetëm apo edhe si bashkim operatorësh me shoqëri të tjera.
Të dhënat publike tregojnë se “Kupa” shpk është fituese në tendera të ndryshëm, të zhvilluar nga Bashkia e Tiranës, Bashkia Kamzës, Autoriteti Rrugor Shqiptar e shumë institucione të tjera publike.
