Në një seancë gjyqësore në Belgjikë, mbrojtja e Merita A., një shtetase shqiptare 50-vjeçare e akuzuar për transport të parave të ardhura nga trafiku i drogës, hodhi poshtë akuzat duke argumentuar mungesën e kompetencës territoriale të drejtësisë belge.
Sipas prokurorisë, Merita A. ka marrë pjesë në transportin e zarfeve me para të gatshme, të cilat janë dërguar disa herë nga Belgjika në Shqipëri me kërkesë të Eridan M.G., një prej drejtuesve kryesorë të trafikut.
Mbrojtja pretendon se e akuzuara nuk kishte dijeni për përmbajtjen e zarfeve dhe se veprimi i saj ishte një akt ndihme ndaj një personi që e njihte që nga fëmijëria.
Avokati i saj theksoi se “prokuroria ka shkuar shumë larg” dhe se nuk ekziston asnjë bazë ligjore që të mundësojë ndjekjen penale të një shtetaseje shqiptare për veprime të kryera në territorin shqiptar.
Ai u ndal edhe te faktorët kulturorë dhe shoqërorë që, sipas tij, kanë ndikuar në sjelljen e Merita A., duke përmendur lidhjet e forta familjare, mosbesimin ndaj autoriteteve dhe dominimin mashkullor në shoqërinë shqiptare.
Avokatja e dytë, znj. Couquelet, kërkoi që të mos shqiptohej dënim me burg, duke theksuar kushtet e vështira të mbajtjes në Shqipëri, në rast ekstradimi apo rikthimi të të akuzuarës.
Gjykata pritet të japë vendimin në javët në vijim, ndërsa çështja ka ngjallur debat mbi kompetencat ndërkombëtare të ndjekjes penale dhe ndikimin e kulturës në sistemin e drejtësisë. / La Libre
