Kreu i KQZ, Ilirjan Celibashi kërkoi në Konferencën “30 vite partneritet dhe progres: Shqipëria, Këshilli i Evropës dhe Komisioni i Venecias” që reforma zgjedhore të adresojë disa prej çështjeve të pazgjidhura, mes tyre financimi i partive politike nga palët e treta, fushata online dhe garantimi i mundësisë për të votuar në banesë për personat me probleme shëndetësore.
“Në kuadër të organizimit dhe funksionimit të partive politike dhe financimi të fushatave zgjedhore të partive politike ngelet që të shikojmë se çfarë do të duhet të bëjmë me financimin e palëve të treta që angazhohen dhe mbështesin subjekte të caktuara politike. Duhet rregulluar ky aspekt”, tha Celibashi.
Celibashi ka evidentuar mungesa në Kodin Zgejdhor, duke theksua se nuk parashikohet asgjë mbi rrjetet sociale apo fushatës së organizuar online.
Ai kërkoi që të zgjidhej edhe problematika e votimit për personat që jetojnë shumë larg qendrave të votimit, por edhe atyre që janë afër, por nuk kanë mundësi për shkaqe shëndetësore.
“Duhet të zgjidhim çështjen e votuesve që nuk mund ta ushtrojnë këtë të drejtë. Kanë të drejtën e votës por nuk mund të dalin nga banesa për arsye shëndetësore. Kjo është e papranueshme sidomos tani kur ne ia çojmë fletën e votimit edhe shqiptarëve në Australi, ndërsa ata që e kanë shtëpinë e tyre sipër ose në krah të qendrës së votimit nuk votojnë dot se nuk dalin nga banesat për shkaqe shëndetësore”, tha ai.
