Presidenti amerikan Donald Trump po shqyrton mundësinë e një ndërhyrjeje ushtarake në Venezuelë, duke përforcuar praninë e forcave amerikane në Karaibe dhe duke fluturuar bombardues B-52 pranë bregdetit të vendit këtë javë.
Ndërkohë, presidenti venezuelian Nicolás Maduro po përgjigjet duke ripozicionuar trupat, duke mobilizuar miliona ushtarë dhe duke kritikuar aktivitetet amerikane, një tension që sa vjen e rritet mes dy udhëheqësve.
Zyrtarë të administratës Trump kanë pranuar se shtimi i presionit amerikan ka si qëllim largimin e Maduros nga pushteti, një objektiv që ishte edhe në mandatin e parë të Trump, kur SHBA-të njohën liderin opozitar Juan Guaidó si president legjitim të Venezuelës në 2019-ën.
Së fundmi, ushtria amerikane ka vendosur anije lufte dhe pajisje të tjera në rajon, duke goditur edhe anije që supozohet se transportonin drogë. Trump po ashtu autorizoi CIA-n të kryejë veprime sekrete në Venezuelë dhe tha se po shqyrtohet mundësia e sulmeve në territorin venezuelian.
Maduro pretendon se ka gati mbi 8 milionë rezervistë, edhe pse ekspertët vënë në dyshim këtë shifër dhe cilësinë e trajnimit të tyre. Më 17 tetor, 20 nga 23 njësi administrative në Venezuelë janë militarizuar si pjesë e mobilizimeve ushtarake të quajtura “Independence 200”.
Trump e ka përshkruar veten si “president ndërmjetës” dhe ka thënë se SHBA-të po ushtrojnë presion për të detyruar Maduron të largohet vullnetarisht, me kërcënim ushtarak në rast se ai e bën këtë gjë. Goditjet e fundit ndaj anijeve që transportonin drogë shihen si mesazh i drejtpërdrejtë për liderin venezuelian.
Ndërkohë, Maduro ka shpallur në fund të shtatorit një dekret emergjent që i jep atij kompetenca të gjera politike, sociale dhe ekonomike në rast të një sulmi ushtarak.
Pavarësisht kërcënimit ushtarak, jeta e përditshme në Venezuelë vazhdon.
Në Caracas janë mbajtur koncertet dhe tubime me mijëra pjesëmarrës, por qytetarët jetojnë me ankth për praninë e anijeve amerikane dhe mundësinë e një sulmi. Por duhet thënë se disa kanë shfaqur mbështetje të kujdesshme për presionin amerikan ndaj Maduros.
Ushtria amerikane ka kryer së paku gjashtë goditje ndaj anijeve që dyshohet se transportonin drogë në Karaibe.
Trump ka autorizuar CIA-n të veprojë brenda Venezuelës për të frenuar trafikun e drogës dhe fluksin e emigrantëve, duke lënë të hapur mundësinë për ndërhyrje më të gjerë.
Operacionet kanë ngritur shqetësime ligjore brenda Pentagonit, pasi disa ekspertë të së drejtës ndërkombëtare pyesin nëse goditjet ndaj anijeve që transportojnë drogë janë të ligjshme.
