Kryedemokrati Sali Berisha ka deklaruar se Presidenti Bajram Begaj nuk duhej të firmoste kurrë vendimin për dekretimin e zgjedhjeve të pjesshme të Bashkisë Tiranë, në një kohë kur Erion Veliaj kishte ankimuar në Kushtetuese vendimin për shkarkimin e tij.
Berisha u shpreh se “Begaj është i padenjë, jo për postin e Presidentit, por me dosjet që i rëndojnë”.
Sipas kreut të PD-së, Rama ka frikë dhe tmerr nga Erion Veliaj. Kjo, sipas Berishës, për shkak se “Veliaj di më shumë se çdo shqiptar tjetër për Edi Ramën”.
Referuar vendimit të Kushtetueses për pezullimin e zgjedhjeve të pjesshme në Bashkinë Tiranë më 9 Nëntor, Berisha u shpreh se kandidati i opozitës për Tiranën, Florjan Binaj po bënte përgatitje të ethshme.
Ai shtoi PD është e përgatitur edhe për zgjedhjet që do mbahen në 5 bashkitë e tjera.
“Për Bashkinë Tiranë ishim të përgatitur, kandidati po bënte përgatitje të ethshme, por vendimi i Kushtetueses mirëpritet nga çdo qytetar. Në të gjitha bashkitë e tjera jemi të gatshëm, kandidatët janë shpallur, janë kandidatura intelektualësh, biznesmenë, mjekë, të pavarur, do të kenë mbështetjen e PD-së.
Begaj është i padenjë, jo për postin e Presidentit, por me dosjet që i rëndojnë. Ndaj dhe ai i lejoi vetës të firmosë një vendim që kurrë nuk mund ta firmoste.”
