Nga Boldnews.al
Gjykata Kushtetuese pezulloi njëzëri dekretin e Presidentit të Republikës, Bajram Begaj, për zhvillimin e zgjedhjeve të parakohshme në Tiranë, duke e nxjerrë zbuluar kreun e Shtetit dhe stafin e tij ligjor.
Në 1 tetor 2025, Begaj miratoi dekretin për zgjedhjen lokale në Tiranë, pasi Këshilli i Ministrave vendosi shkarkimin e kryebashkiakut të arrestuar, Erion Veliaj. Duke e konsideruar shkarkimin anti-kushtetues, Veliaj iu drejtua me ankim Gjykatës Kushtetuese.
Kushtetuta parashikon se ankimi pezullon menjëherë shkarkimin. Por, Begaj, i cili është edhe Garant i Kushtetutës, sapo mori nga kryeministri Edi Rama vendimin e shkarkimit të Veliajt, dekretoi me urgjencë zgjedhjet.
Begaj e argumentoi dekretin e tij, duke u bazuar tek këshilltarët ligjorë. Këshilltari i tij kryesor është Ilir Rusmali.
Pas kritikave të opozitës se Presidenti është kthyer në një kukull të kryeministrit Edi Rama, ky i fundit mori në mbrojtje vendimin e Kreut të Shtetit, duke vlerësuar lart këshilltarin Rusmali.
“Ata që diskutojmë legjitimitetin e dekretit nuk kanë faj, sepse nuk kanë as shkollën, as pavarësinë intelektuale të Ilir Rusmalit, këshilltarit juridik të Presidentit”, deklaroi Rama, në një bisedë me kandidaten e tij për Bashkinë e Tiranës, Ogerta Manastirliu, duke shtuar më tej se ai “ka qenë “ministër i Partisë Demokratike dhe që vetëm për integritetin e tij dha dorëheqjen dhe nuk pranoi të bëhej palë me korrupsionin..”.
Rama i referohet kohës kur Ilir Rusmali ishte në kabinetin e qeverisë “Berisha”. Por, prej asaj kohe, kanë kaluar shumë ujëra. Rusmali ndryshoi tërësisht drejtim politik dhe aktualisht është përfaqësues i Partisë Socialiste të Edi Ramës në Komisionin e Ankesave dhe Sanksioneve të Zgjedhjeve (KAS), krahas pozicionit të këshilltarit të presidentit Begaj.
Tashmë që Gjykata Kushtetuese rrëzoi njëzëri “intelektualin e pavarur”, Ilir Rusmali, e bashkë me të nxori bllof shefin institucional, Bajram Begaj dhe atë politik, Edi Rama, dikush duhet të mbajë përgjegjësi.
Ose Bajrami do të shkarkojë këshilltarin, ose këshilltari do të shkarkojë Presidentin.
