Marrëveshja e arritur me Izraelin për një armëpushim në Gaza “shënon fillimin e përfundimit të plotë të luftës brutale kundër Rripit të Gazës”, sipas zëdhënësit të Hamasit në enklavë.
“Ka padyshim garanci për Hamasin që lufta nuk do të rikthehet pas përfundimit të procesit të shkëmbimit dhe dëgjuam gjithashtu presidentin amerikan të flasë drejtpërdrejt, publikisht dhe qartë për këtë çështje”, tha Hazem Qassem për CNN sot.
Qassem tha se Hamasi vlerëson përpjekjet e administratës amerikane dhe Presidentit Donald Trump “dhe Hamasi do të zbatojë gjithçka që përfshihet në marrëveshje për të siguruar një armëpushim të plotë dhe të qëndrueshëm”.
“Ne si Hamas shprehëm falenderimet tona për Presidentin Trump për ndihmën në arritjen e kësaj marrëveshjeje. Presidenti Trump ishte i përkushtuar për t’i dhënë fund luftës në Rripin e Gazës dhe i bëjmë thirrje sërish që të vazhdojë të ushtrojë presion ndaj pushtimit për të zbatuar plotësisht të gjitha kushtet e marrëveshjes”, tha Qassem.
Ka pasur rregullime në hartën për tërheqjen e pjesshme të trupave izraelite “për të mundësuar rezistencës të kryejë një operacion të plotë shkëmbimi për të gjithë të burgosurit, qofshin trupat e të vdekurve apo ata që janë gjallë”, shtoi ai.
Nuk është e qartë nëse Izraeli ka pranuar këto rregullime. Qassem gjithashtu pretendoi se Izraeli po konteston listën e 250 të burgosurve palestinezë që pritet të lirohen si pjesë e fazës së parë të marrëveshjes.
“Pushtimi po përpiqet të manipulojë listën e të burgosurve (palestinezë) që rezistenca ka dorëzuar për lirimin. Nevojitet presion për të siguruar zbatimin e plotë të marrëveshjes, në mënyrë që të arrihet një proces i gjithanshëm shkëmbimi”, tha Qassem.
