Nga Boldnews.al
Shqipëria është vendi ku, mijëra qytetarë presin me dekada për të marrë pronën, disave që u soset durimi gjyqeve, sorollatjeve nëpër institucione, zgjedhin hakmarrjen, shkrepin armën, ndaj të afërmve, fqinjëve, së fundi, edhe ndaj një gjyqtari brenda gjykatës, në mes të Tiranës.
Shqipëria është vendi ku, vrasësi i gjyqtarit pret me duar në xhepa Policinë e Shtetit brenda oborrit të gjykatës.
Shqipëria është vendi ku, qytetarëve u duhet të presin sa të kenë frymë, për të marrë një certifikatë pronësie, për ta pasur njësoj si certifikata e vdekjes.
Shqipëria është vendi ku, Kryeministri dhe Qeveria flasin për shërbime të dixhitalizuara, për inteligjencë artificiale, për shërbime online pa pagesë, por mijëra qytetarë nuk marrin dot një përgjigje pa sekser për një dokument të thjeshtë në zyrat e Kadastrës.
Shqipëria është vendi ku, edhe pasi ke mbuluar me dhe një fëmijë 3-vjeçar që shkon te dentisti për pastrim dhëmbësh, mjekja, e bija e një mjeku me përvojë, ka guximin të mbaj qëndrime publike për të shprehur krenarinë mbi suksesin e punës së saj. Dy vite pas ngjarjes së rëndë, mjeku u la nga gjykata në masën “arrest shtëpie” për “vrasje nga pakujdesia”, vogëlushi Brian nuk jeton më.
Shqipëria është vendi ku, një fëmijë vritet me thikë në zemër nga bashkëmoshatarët në pragun e shkollës, e që shteti me policinë e rilindur nuk u përgjigjet dot institucioneve arsimore kur kërkojnë ndihmë për konfliktet e fëmijëve. Deri më sot, asnjë përgjegjësi institucionale. 14-vjeçari Martin Cani, prej gati 1 viti nuk jeton më.
Shqipëria është vendi ku, shkollat janë po aq të pasigurta sa janë institucionet që japin vendime në emër të Republikës.
Shqipëria është vendi ku, të gjitha ngjarjet janë kronikë e një vrasje të paralajmëruar, por institucionet mbyllin “sytë” deri në ditën kur ndodh gjëma.
Shqipëria është vendi ku, një gjyqtare, nënë e dy fëmijëve, vritet në mes të rrugës nga ish-bashkëshorti.
Shqipëria është vendi ku, ku mijëra grave dhe vajzave, viktima të dhunës në familje, nuk u sigurohet dot mbrojtje ligjore dhe sociale nga shteti, që në shumicën e rasteve i lë në një banesë me dhunuesin. Mbi 5 mijë raste të denoncuara në polici gjatë vitit 2024.
Shqipëria është vendi ku, një i ri, i dehur, i jep makinës me shpejtësi skëterrë dhe këput në lule të rinisë dy motra, që dilin shisnin misra për të kuruar të vëllanë me sëmundje të rëndë.
Shqipëria është vendi ku, çunat e “babit” me makina luksi, nuk i ndalon dot në rrugë, s’ua merr dot as patentën. Ata janë në fluturimin e jetës!
Shqipëria është vendi ku, qindra gra dhe vajza të prekura nga tumori, fëmijë me sëmundje të rënda, sistemi shëndetësor i le me muaj pa mjekim e trajtim, duke i shkurtuar jetën. 224 vdekje nga kanceri i gjirit në vitin 2024.
Shqipëria është vendi ku, qytetarët helmohen çdo ditë nga ushqimet e pakontrolluara.
Shqipëria është vendi ku, jeta dhe shëndeti i qytetarëve nuk kanë asnjë vlerë. Ata numërohen vetëm për votime.
Shqipëria është vendi ku, ligjin e bëjnë të fortët, ndërsa oligarkët vënë në lëvizje shtetin.
Shqipëria është vendi ku, qeveria thur ligje e plane për të përfituar një grusht njerëzish, ndërsa populli numëron qindarkat për të shtyrë muajin.
Shqipëria është vendi ku, qytetarët presin të shohin pak drejtësi, por drejtësia merr në këmbim plumbat e pushtetit.
Shqipëria është vendi ku, shteti, dhe shteti i së drejtës, nuk funksionojnë, por ëndërron të jetë europiane.
Shqipëria është vendi ku, shtetin dhe qytetarët i vret çdo ditë PUSHTETI!
