Dy persona, mes tyre edhe një grua, u arrestuan nga policia në Fier pasi në automjetin e tyre iu gjet një armë zjarri pistoletë me municion luftarak.
Të arrestuarit janë: Gentjan Ndreko alias Gentian Selaci, 40 vjeç, banues në fshatin Sulaj, dhe Ana Pelanaj, 31 vjeçe, banues në fshatin Portëz.
Policia sekuestruar armën e zjarrit, automjetin dhe dy aparate celularë.
Sipas njoftimit të policisë, dy të arrestuarit po lëviznin me një automjet tip “Audi” në lagjen “Apollonia” kur u ndaluan për kontroll. Në momentin e ndërhyrjes, drejtuesi dhe pasagjerja tentuan të largohen, por u kapën menjëherë.
Njoftimi i policisë
Pas informacioneve të marra në rrugë policore se me një automjet tip “Audi”, lëviznin shtetas të armatosur, shërbimet e Patrullës së Përgjithshme të Komisariatit të Policisë Fier me mbështetjen dhe të Forcës së Posaçme “Shqiponja”, pasditën e djeshme, në lagjen “Apollonia” kanë ndaluar për kontroll automjetin tip “Audi” me të cilin qarkullonin 2 shtetas. Në momentin e ndërhyrjes së Policisë, drejtuesi i automjetit dhe pasagjerja kanë tentuar të largohen por janë kapur menjëherë nga shërbimet e Policisë.
Gjatë kontrollit, në çantën marsup të drejtuesit të automjetit, u gjet një armë zjarri pistoletë me municion luftarak.
Arma e zjarrit u sekuestrua në cilësinë e provës materiale, bashkë me automjetin dhe 2 aparate celularë.
Në vijim të veprimeve për rastin, nga specialistët për Hetimin e Krimeve të Komisariatit të Policisë Fier u arrestua në flagrancë shtetasi G. N. alias G. S., 40 vjeç, banues në fshatin Sulaj, për veprat penale “Mbajtja pa leje dhe prodhimi i armëve, armëve shpërthyese dhe i municionit” dhe “Mosbindja ndaj urdhërit të punonjësit të policisë së rendit publik” dhe shtetasja A. P., 31 vjeçe, banuese në fshatin Portëz, për veprat penale “Veprime që pengojnë zbulimin e së vërtetës” dhe “Mosbindja ndaj urdhërit të punonjësit të policisë së rendit publik”.
