Kryetari i Partisë Demokratike, Sali Berisha, ka lëshuar akuza të forta ndaj kandidates socialiste për Bashkinë e Tiranës, Ogerta Manastirliu.
Në një deklaratë publike, Berisha tha se veprimet e Manastirliut gjatë periudhës kur drejtonte Ministrinë e Shëndetësisë përbëjnë “krime kundër njerëzimit” dhe paralajmëroi se PD mund të përgatisë një dosje për Gjykatën Ndërkombëtare.
Sipas tij, pacientët janë lënë pa trajtim për shkak të përdorimit të ilaçeve të skaduara, ndërsa aparatura jetike për mjekimin e të sëmurëve kanë qëndruar të prishura për muaj të tërë, edhe pse mund të rregulloheshin brenda pak ditësh.
“Janë akte makabre, janë lënë njerëz të sëmurë në mëshirë të fatit. Për ligjin shqiptar nuk konsiderohen vepër penale, por për konventat ndërkombëtare klasifikohen si krime kundër njerëzimit” , tha Berisha, duke shtuar se opozita po shqyrton mundësinë e përgatitjes së një dosjeje për t’i dërguar në gjykatë ndërkombëtare.
Berisha: Ndaj dhe unë u ftoj të përqendrohemi në një përgjigje. Koha është jashtëzakonisht e ngushtë, e shkurtër, por duke pasur parasysh se përpara nga organizata kriminale e PS është një nga eksponentët më kryesorë të krimit, që me qëndrimet e saj u garantoj se jo në Shqipëri, dhe do ta konsiderojmë këtë nëse mund të përgatitet një dosje për gjykatën ndërkombëtare, pasi janë lënë të sëmurët në mëshirën e ilaçeve të skaduara, duke ua ndërruar etiketat, ka akte makabre, janë lënë muaj të tërë aparaturat e prishura, të cilat mund të rregulloheshin brenda një jave maksimumi.
Pra, janë shumë akte që për Altin Troplinin nuk përbëjnë vepër penale, por për konventat ndërkombëtare janë akte që ngjiten në krime kundër njerëzimit.
Ndaj dhe ne do i konsiderojmë… nuk mund të them se duhet të këshillohemi me juristë me eksperiencë, por për mendimin edhe e meriton plotësisht si një qëndrim ndaj këtij regjimi.
