Partia Demokratike zhvilloi sot mbledhjen e Kryesisë, me fokus zgjedhjet e pjesshme vendore të 9 nëntorit.
Kryetari i PD-së, Sali Berisha, deklaroi se gjatë këtij takimi do të përcaktohet modeli që opozita do të ndjekë për garën elektorale, përfshirë edhe atë në Bashkinë e Tiranës.
Në mbledhje pritet të raportojë grupi i punës mbi ecurinë e bisedimeve me aleatët opozitarë për përfaqësimin në zgjedhjet vendore.
Po ashtu, do të diskutohet për organizimin e procesit zgjedhor në 6 bashkitë ku pritet të zhvillohen zgjedhjet, përfshi edhe kryeqytetin.
“Mblidhemi sot për të vendosur modelin që do të përzgjedhim si kryesi e PD-së, për garën elektorale për Bashkinë e Tiranës. Që në fillim dua të theksoj se dhunimet flagrante të kushtetutës, nga individë të lidhur me krimet, me vjedhjet dhe përvetësimet e mëdha të pronave publike, si Edi Rama dhe kukulla e tij në Presidencë, selia e dhunimit të Kushtetutës, me aktet e tyre, me të drejtë, e mbajnë të debatueshëm, e bëjnë terrenin antikushtetues. Në këtë kontekst, të debatueshëm, pjesëmarrjen tonë në garën elektorale. Por, për të gjithë ata që e kanë parasysh se ne jetojmë në një diktaturë autoritare, në të cilën kushtetua është letër e vdekur, ligji është letër pa vlerë, të kërkosh Kushtetutë në një regjim autoritar, të bazuar në drogën, është si të kërkosh pika uji në shkretëtirë. Parimet e Kushtetutës janë të pavdekshme. Bojkoti, i cili është një vendim që para çdo padrejtësie, të vjen i pari në mendje. Është provuar me një efekt destruktiv për opozitën.”, tha ai.
