Sali Berisha ka akuzuar Edi Ramën për ironinë e tij ndaj presidentit Trump dhe për deklaratat në samitin europian, duke e cilësuar si hipokrit dhe të dëmshëm për interesat shqiptare dhe europiane.
Berisha e cilësoi Ramën si “kloun ndërkombëtar” dhe “kukull e Xhorxh Sorosit”, duke e akuzuar se ka përdorur samitin e Bashkimit Politik të Europës për të ironizuar një proces të suksesshëm paqeje si ai i Kaukazit.
Në deklaratën e tij, Berisha tha se Rama ka bërë një “akt të verbër” duke u tallur me presidentin Trump dhe duke e paraqitur Europën si një kontinent të paqes, ndërkohë që sipas tij, dy luftërat botërore kanë lindur pikërisht në Europë.
Ai e quajti këtë një hipokrizi të thellë dhe një përpjekje për të minimizuar rolin e SHBA-së në proceset globale të paqes.
Dje shqiptarët, europianët dhe qytetarët e mbarë botës panë se kreu i organizatës kriminale të Tiranës është njëherazi edhe klouni ndërkombëtar. Edi Rama shfrytëzoi samitin e Bashkimit Politik të Europës për të përqeshur, për t’u tallur me presidentin e SHBA.
Konkretisht, me një proces të suksesshëm paqeje siç ishte paqja e Kaukazit.
Edi Rama, kllounadën e tij, që e filloi në sallën e samitit, e vazhdoi më vonë me mediat, duke bërë të njëjtat deklarata.
Në një akt të verbër, kukulla e Xhorxh Sorosit, mendoi se ky është shërbimi më i madh që mund t’i bëjë këtij të fundit.
Por ky është shërbimi më i keq që Edi Rama mund t’u bëjë shqiptarëve.
Ky është shërbimi më i keq që Edi Rama mund t’i bëjë Europës.
Në darkë u përpoq të marrë kthesën duke dëshmuar edhe njëherë se sa hipokrit dhe i pakarakter është.
Kam sjellë këtu jo kllounadën e tij me paqen e Kaukazit, por kam sjellë deklaratat e tij zyrtare për të kuptuar se çfarë hipokriti dhe i pakarakter është.
Me datën 1 shtator të vitit 2025, në forumin e Bledit në Slloveni, kukulla e Xhorxh Sorosit, Ramaduro, në fjalën e tij theksoi: askush nuk mund të thotë se ka ndonjë lloj paqartësie, por besoj se Europa nuk duhet të presë se çfarë do të ndodhë në anën tjetër të oqeanit me planin e paqes për Ukrainën. Europa është përmbi të gjitha paqe, është kultura e paqes, është paqja në kulturë.
Sipas tij, Europa-paqe nuk duhet të pyesë SHBA-luftë apo Europa-kultura e paqes, paçka se ka shkaktuar dy tragjeditë më të mëdha botërore të të gjitha kohërave, luftën e parë dhe luftën e dytë, qenka kultura e paqes, kurse urat e zjarrit del se paskan ardhur nga përtej Atlantikut.- tha ai.
