Është shoqëruar me debate Konferenca e Kryetarëve në Kuvend, ku opozita akuzoi mazhorancën për shkelje të rregullores dhe shmangie të debatit mbi çështje të rëndësishme.
Kreu i grupit parlamentar të PD-së, Gazment Bardhi, kërkoi thirrjen urgjente të Këshillit të Legjislacionit për shqyrtimin e kërkesës për shkarkimin e Kryetares së Kuvendit dhe denoncoi injorimin e mocionit me debat për programin e qeverisë për katër vitet e ardhshme. Ai theksoi se kalimi i çështjeve pa debat shkel Kushtetutën dhe rregulloren e Kuvendit, duke përmendur rastet kur raportet e institucioneve raportojnë në komisione të papërshtatshme.
“Ju sjell në vëmendje se keni detyrim të thërrisni Këshillin e Legjislacionit për kërkesën e Partisë Demokratike për shkarkimin e Kryetarit të Kuvendit. Thirrja e Këshillit është një detyrim që ju duhet ta respektoni.
Kemi depozituar gjithashtu një kërkesë për ripërsëritjen e seancës së datës 12 shtator. Kalimi i çështjeve pa debat, siç e kemi argumentuar, është në shkelje të Kushtetutës dhe të Rregullores së Kuvendit. Kjo kërkesë duhet të përfshihet.
Çështja e tretë: kemi dorëzuar një kërkesë për Mocion me Debat mbi programin e qeverisë për katër vitet e ardhshme. Sipas rregullores, ky mocion duhej të ishte përfshirë në rendin e ditës së kësaj mbledhjeje të Konferencës së Kryetarëve. Sot është dita e tretë që, sipas afateve të rregullores, përfundon pa asnjë njoftim për mbledhje tjetër.“, tha Bardhi.
Deputetja Jorida Tabaku kritikoi mazhorancën për kalimin e raporteve në komisione të gabuara, duke theksuar se kjo shkel rregulloren që vetë mazhoranca ka miratuar. Ajo shtoi se disa çështje, si raporti i Komisionerit për Mbrojtjen e të Dhënave Personale, nuk duhet të kalojnë te Komisioni i Ligjeve, por tek komisioni përgjegjës për të Drejtat e Njeriut.
“Raporti i Komisionerit për Mbrojtjen e të Dhënave Personale nuk dihet pse duhet të kalojë te Komisioni i Ligjeve. Komisioni përgjegjës për këtë çështje është Komisioni i ri për të Drejtat e Njeriut. Nuk mund të ketë komisione “kryesore” dhe të “dorës së dytë”. Po shkelni vetë rregulloren që e keni miratuar.”, tha Tabaku.
Nga ana e tij, Agron Gjekmarkaj akuzoi PS se po manipulon të vërtetën dhe po i shmanget llogaridhënies pas publikimit të raportit të Departamentit Amerikan të Shtetit për Shqipërinë. Ai tha se mazhoranca i trembet debatit mbi korrupsionin dhe dështimet e saj, duke krijuar një realitet të rremë për të fshehur problemet reale që ka vendi.
“Pavarësisht se vini nga zgjedhje farsë, Kuvendi ka zgjedhur një Kryetare dhe nuk është e nevojshme të zgjedhim një tjetër për të kontrolluar atë që kemi zgjedhur. Nuk doja të flisja, por zoti Balla, si gjithmonë, ka krijuar një të vërtetë të tijën, duke folur për “arritje”.
Në fakt, dje doli një raport i Departamentit Amerikan të Shtetit. Kuvendi duhet të krijojë hapësirë për të diskutuar mbi ato çështje themelore që ngrihen në raport: krimi, korrupsioni, një realitet i zymtë. Por ju po i ikni të vërtetës, duke ndërtuar një realitet fals. I shmangeni përgjegjësisë për të diskutuar mbi qeverisjen tuaj, sepse i trembeni transparencës.”, tha Gjekmarkaj .
