Evzon Paci i dha firmës “Interior Kontrast Sakt” truallin në zonën e Myslym Shyrit për të ndërtuar pallat, me marrëveshjen, që do të përfitonte apartament dyqan dhe parkim. Por kur u kthye nga jashtë, apartamenti i tij dhe dyqani i tij ishin shitur tek një tjetër person, duke e lënë Evzonin me gisht në gojë.
“Kam pasur një truall këtu të trashëguar nga familja ime. Në vitin 2017 më ofrohet zoti Arian Muça për të zhvilluar pronën dhe për të bërë një ndërtim. Firmosim të gjitha kontratat dhe do të përfitoja një apartament, një dyqan dhe një garazh. Punimet nisën rreth vitit 2017, pasi vij nga jashtë, sepse nuk jetoj në Shqipëri, pashë që prona ime ishte zënë.
Dyqani ishte bllokuar dhe ishte kthyer në shkallë elektrike për katin -1. Në këtë moment kam vetëm një garazh, që edhe atë nuk ma kanë dorëzuar akoma. Gjatë kësaj kohe kam biseduar me drejtuesin, më thoshte që më duhet ta zgjidh me dikë tjetër, ndërkohë që unë jam pronari i truallit dhe kisha të drejtën që të zgjidhja i pari. Kam bërë edhe një pagesë përmes bankës dhe në momentin që do të shlyhej i gjithë detyrimi, ai do të më dorëzonte apartamentin.
Kur vij drejtuesi ishte arrestuar. Kam bërë edhe kallëzime, nga emisioni “Stop” kërkoj një zgjidhje për këtë pronë që kam kohë që merrem. Është shpresa ime e fundit, sepse në të tjerat kam shumë kohë që merrem, ma zvarrisin. Të gjithë kanë hyrë nëpër shtëpitë e tyre, kurse i vetmi që nuk kam hyrë akoma, që jam edhe pronari i truallit”, tha për mikrofonin e emisionit “Stop”, denoncuesi.
Qytetari bisedon me personin i cili e ka blerë apartamentin dhe ai thotë se ka qenë Arian Muça ai i cili ia ka shitur.
“Unë s’kam lidhje me atë apartament. Atë e ka shitur Ariani dhe damllaja e ka shitur, ai pisi i m…tit. Ariani ka ngatërruar botën aty. Unë kam shitur vetëm hyrjen time, që ia shita njërit dhe atë e ka marrë Ariani për me qira dhe e ka shitur dhe atë. O ti djalë, ai më ka mua 680 mijë euro, 180 mijë janë të miat dhe 500 janë të Mondit. Ka 4 vite, që ka mbaruar pallati dhe s’kam marrë kokërr leku. Gënje sot, gënje nesër”, thotë qytetari.
Aktualisht ndërtuesi është në burg, ndërsa i biri thotë se nuk ka asnjë lidhje me kompaninë e tij. Evzoni mbeti pa pronë dhe me kallëzimin e tij nuk është bërë asgjë.
“Po pra, por s’jam unë personi, që e kam firmën. Ariani, ai, që e ka. Po, është në burgim. Ç’punë kam unë me firmën? Asnjë s’e administron. Administratori i firmës është në burg. S’di të të jap informacion më tepër. Di, që Ariani ka qenë në gjyq me Evzonin edhe ata janë në gjyq. Pallati, për momentin nuk ka përfunduar”, tha i biri .
Borxhet dhe shitjet e dyfishta kanë krijuar një rrjet mashtrimesh ku askush nuk jep përgjigje. Avokati Arben LLangozi kërkon hetim penal dhe gjyq civil për pronën, që i është mohuar pronarit të ligjshëm./tvklan.al
