Ilir Alimehmeti i qëndron fort idesë se Partia Demokratike duhet të marrë pjesë në zgjedhjet për kryetarin e bashkisë së Tiranës. Në një bisedë në Klan News, ai thotë se kjo është rruga e vetme dhe gara është një ambicie e tij personale. Megjithatë, Alimehmeti ka një projekt të vetin politik ku synon një mandat të plotë 4-vjeçar.
Anjola Hamzaj: E keni ambicie personale për të garuar?
Ilir Alimehmeti: Unë hyra në primaret e 2022 për të hyrë në garë, patjetër që ambicia ekziston, ndryshe pse do të hyja? S’diskutohet.
Anjola Hamzaj: Do të pranonit nëse do jua propozonte Partia Demokratike si kandidat për kryetar i bashkisë së Tiranës?
Ilir Alimehmeti: Jo, ne kemi një situatë që do ta shohim sepse këtu ka disa andralla kushtetuese, ligjore. Ka pyetje do të ketë, s’do të ketë zgjedhje, me shumë mundësi do të ketë, por nuk është aq e sigurt sepse ka kohë ankimimi Erion Veliaj, 15 ditë, janë disa elementë për t’u kaluar. Unë mendoj që do të ketë zgjedhje, PD duhet të futet. Ama duhet të kemi parasysh diçka. Çfarë zgjedhjesh janë, janë zgjedhje të pjesshme, një vit e dy muaj do t’i binte mandati, janë zgjedhje jo me këshill bashkiak sepse këshillit bashkiak i vazhdon mandati deri në 2027 dhe në një vit smund të ofrosh një program zhvillimor në këtë drejtim se të gjitha janë miratuar tani, buxhet, program afatmesëm, strategji, plane. Këtu mandati i kandidatit të PD nëse fiton bashkinë e Tiranës është ta kthejë në legjitimitet bashkinë dhe të jeni të bindur, ka qindra demokratë që mund ta bëjnë. Nga krahu tjetër, zbatimi i një projekti 4-vjeçar është ajo ku e shoh më shumë veten, punën në grup është ajo ku unë më shumë e shoh veten, në ekip nuk jam që të garoj vetëm se dua këtë karrige. Unë kam interes që të kuptojmë misionin dhe vizionin më të madh. Në 2027, vetëm një vit e pak më vonë do të kemi zgjedhje në 61 bashki për mandat të plotë me gjithë këshillat bashkiakë, është garë më gjithëpërfshirëse dhe më e madhe.
