Policia e Shkodrës ka gjetur dhe asgjësuar 8028 bimë të dyshuara narkotike kanabis sativa.
Në kuadër të operacionit policor të koduar “Koordinata”, janë proceduar penalisht, për shpërdorim të detyrave, 5 kryetarë fshatrash, konkretisht, kryetari i fshatit Ndrejaj, shtetasi N. V.; kryetari i fshatit Lekaj, shtetasi P. S.; kryetari i fshatit Nicaj, shtetasi V. V.; kryetari i fshatit Plan, shtetasi N. Sh.; dhe për veprat penale “Shpërdorimi i detyrës” dhe “Moskallëzim krimi”, kryetari i fshatit Kir, shtetasi P. H.
Në territorin e njësive administrative Pult dhe Shosh, shërbimet e Komisariatit të Policisë Shkodër gjetën dhe asgjësuan 7073 bimë të dyshuara narkotike cannabis sativa.
Në territorin e njësisë administrative Kelmend, shërbimet e Komisariatit të Policisë Malësi e Madhe gjetën dhe asgjësuan 780 bimë të dyshuara narkotike kanabis sativa.
Në territorin e njësisë administrative Temal, shërbimet e Komisariatit të Policisë Vau i Dejës gjetën dhe asgjësuan 175 bimë të dyshuara narkotike kanabis sativa.
Vijon puna për identifikimin, kapjen dhe vënien para përgjegjësisë penale të autorëve të kultivimit të bimëve narkotike.
