Siç ishte parashikuar, presidenti francez Emmanuel Macron ka konfirmuar këtë të hënë më 22 shtator, se qeveria e tij do të njohë zyrtarisht shtetin e Palestinës, duke iu bashkuar një vale vendesh që kanë ndërmarrë këtë hap gjatë javëve të fundit.
Në fjalën e tij në Konferencën e Kombeve të Bashkuara që po mbahet në New York, Macron theksoi se koha ka ardhur për t’i dhënë fund luftës në Gaza dhe për të liruar 48 pengjet e mbetura në duart e Hamasit. “Bota është vetëm disa momente larg nga humbja e mundësisë për paqe. Nuk mund të presim më,” u shpreh ai.
“Franca ka qenë gjithmonë në anën e një paqeje të drejtë dhe të qëndrueshme. Prandaj, kemi vendosur ta njohim zyrtarisht shtetin palestinez, në përputhje me angazhimet tona historike dhe në mbështetje të zgjidhjes me dy shtete,” deklaroi Macron
Kreu i Elysee-s dënoi sulmet e 7 tetorit, por shtoi se “asgjë nuk justifikon luftën që vazhdon”, duke theksuar se e vetmja zgjidhje është krijimi i dy shteteve që bashkëjetojnë në paqe.
Macron propozoi gjithashtu ngritjen e një administrate tranzitore në Gaza, të udhëhequr nga Autoriteti Palestinez, që do të ketë për detyrë çmontimin e Hamasit. Ai deklaroi se Franca është e gatshme të kontribuojë në një mision stabilizues, duke hapur mundësinë e një pranie ndërkombëtare sigurie në territor. Megjithatë, Macron sqaroi se ambasada franceze në shtetin palestinez do të hapet vetëm pasi të arrihet armëpushim dhe të lirohen të gjithë pengjet.
