Partia Demokratike ka denoncuar një rast tjetër të supozuar të klientelizmit në sektorin e mbrojtjes dhe sigurisë, ku sipas zëdhënëses së Antikorrupsionit në PD, Genta Vangjeli, tenderat po shfrytëzohen për përfitime të familjarëve të pushtetit.
Bëhet fjalë për tenderin e zhvilluar nga Ministria e Mbrojtjes, e drejtuar nga Pirro Vëngu, për ndërtimin dhe rrethimin e bazës në Mengël, Elbasan. Vlera e tij është 460 mijë euro, që përbën 98% të fondit limit. Tenderi përfshinte ndërtimin e rrethimit të jashtëm, sistemin e kamerave, rrjetin e ndriçimit, portat hyrëse dhe vendqëndrimin e rojeve.
Sipas PD-së, operatorët fitues janë dy kompani të lidhura ngushtë me pushtetin lokal të Partisë Socialiste:
G & M CONSTRUCTION 07 sh.p.k., në pronësi të Maliq Zotkaj, djali i kryebashkiakut të Poliçanit, dhe Oligert Dyrmishi, ish-drejtor i ndërtimit në bashkinë përkatëse.
ASI-2A CO sh.p.k., në pronësi të bashkëshortit dhe kunatit të ish-zëvendëskryetares së Bashkisë Fier, aktualisht këshilltare për çështje ekonomike, Eleni Gjikondaj.
Deklarata e Plotë:
Partia Demokratike denoncon një tjetër rast ku edhe tenderat në sektorin e mbrojtjes dhe sigurisë po kthehen në biznes për familjarët e pushtetit. Ministria e Mbrojtjes, e drejtuar nga Pirro Vëngu, ka zhvilluar një procedurë të kufizuar për objektin: ‘Ndërtim i rrethimit të jashtëm pjesor, sistemin e vëzhgimit me kamera, rrjetin e ndriçimit perimetral, ndërtimin e portave hyrëse dhe vendqëndrimit të rojeve në pronën nr. 318 dhe nr. 319, Mengël, Elbasan’.
Për këtë tender u të kufizuar u paraqit vetëm një ofertë, dhe pikërisht kjo ofertë u shpall fituese, me vlerën 460 mijë euro – 98% të fondit limit.
Bashkimi i operatorëve fitues përbëhet nga dy kompani të lidhura ngushtë me pushtetin lokal të Partisë Socialiste:
Kompania ‘G & M CONSTRUCTION 07’ sh.p.k. në pronësi të Maliq Zotkaj , djali i kryebashkiakut të Poliçanit dhe Oligert Dyrmishi i cili ka mbajtur detyrën e Drejtorit të ndërtimit për ndërtesa dhe punime publike pranë së njëjtës bashki ;
Kompania tjetër ‘ASI-2A CO’ sh.p.k. është në pronësi të bashkëshortit dhe kunatit të ish-zv/kryetares së Bashkisë Fier, aktualisht këshilltare për çështjet ekonomike pranë së njëjtës bashki znj.Eleni Gjikondaj. Ky skandal tregon qartë se klientelizmi ka zëvendësuar konkurrencën e ndershme dhe interesin publik, madje edhe në sektorë që lidhen drejtpërdrejt me sigurinë dhe mbrojtjen.
Partia Demokratike i bën thirrje organeve të drejtësisë të hetojnë menjëherë këtë procedurë dhe kërkon që praktika të tilla të marrin fund. Çdo procedurë tenderimi të zhvillohet me konkurrencë të vërtetë dhe në shërbim të interesit publik, mbrojtjes dhe sigurisë, duke ndaluar përdorimin e taksave të qytetarëve shqiptarë për klientët e pushtetit.
