I dyshuari për vrasjen e Charlie Kirk “nuk po bashkëpunon” me autoritetet dhe nuk ka pranuar se është ai që ka qëlluar. Kështu ka deklaruar guvernatori i shtetit të Utah, Spencer Cox, për mediat amerikane.
Tyler Robinson, 22 vjeç, u arrestua rreth 33 orë pas vrasjes së Charlie Kirk, një aktivist i njohur republikan, i cili u qëllua për vdekje të mërkurën ndërsa po mbante një fjalim pranë një grupi të madh studentësh.
Duke folur për ABC News, guvernatori republikan tha se njerëzit përreth Robinson kanë bashkëpunuar me hetimet. Cox u shfaq në disa media amerikane të dielën në mëngjes, ku përsëriti gjithashtu shqetësimet e tij për ndikimin e rrjeteve sociale pas vrasjes së Kirk.
Guvernatori u pyet edhe për një raport të New York Times, i cili pretendon se Robinson kishte komunikuar me persona të tjerë pas të shtënave përmes platformës Discord, duke përfshirë edhe pretendime se ai kishte bërë shaka se ishte autori i sulmit.
Cox tha për ABC: “Gjithçka që mund të konfirmojmë është se ato biseda vërtet ndodhën, por ata nuk e besuan që ishte ai. Ishte thjesht një shaka, derisa ai ua pranoi se ishte vërtet ai.” Robinson u arrestua të enjten në mbrëmje pasi u dorëzua vetë në polici.
Kirk po mbante një fjalim në një aktivitet të hapur në Utah Valley University, i organizuar nga organizata Turning Point USA, të cilën ai e kishte bashkëthemeluar. Aktiviteti ishte pjesë e një turi fjalimesh që ai po mbante në universitete të ndryshme në SHBA.
Guvernatori Cox i kishte thënë më parë gazetës Wall Street Journal se Robinson, me origjinë nga Utah, ishte “thellësisht i indoktrinuar me ideologji të majtë”.
Kur u pyet për këtë deklaratë në emisionin “State of the Union” në CNN, ai u përgjigj se ky kishte qenë informacion i dhënë nga miqtë dhe familjarët e të dyshuarit.
“Ka shumë gjëra që po mësojmë dhe që do të mësojmë. Kur të ngrihen akuzat zyrtare, do të ketë shumë më tepër prova dhe informacion.”
Cox shtoi se ndër personat që po bashkëpunojnë me hetuesit është shoku i dhomës së Robinson-it, i cili sipas ishte edhe partneri i tij. Ai sqaroi se partneri nuk kishte dijeni për të shtënat dhe ka qenë “jashtëzakonisht bashkëpunues” me hetuesit.
Guvernatori gjithashtu konfirmoi se partneri është “në proces tranzicioni nga mashkull në femër”, por shtoi se autoritetet ende nuk e dinë nëse kjo ka lidhje me rastin.
Një dokument zyrtar nga shteti i Utah konfirmon se Robinson është arrestuar nën dyshimet për vrasje të rënduar, përdorim të paligjshëm të armës, dhe pengim të drejtësisë. Ai aktualisht po mbahet në burgun e Qarkut të Utah pa të drejtë lirimi me kusht.
“Po intervistojmë çdo person që e njeh atë dhe po përpiqemi të mësojmë më shumë rreth motivit të mundshëm,” tha guvernatori Cox.
Ceremonia përkujtimore për Kirk do të mbahet më 21 shtator në stadiumin State Farm në Arizona, ku ai jetonte me bashkëshorten dhe dy fëmijët e tij. Bashkëshortja e tij, Erika, të shtunën mbajti një fjalim emocional ku falënderoi shërbimet e urgjencës dhe premtoi se “zëri i bashkëshortit të saj do të mbetet i gjallë”.
