Zegjine Çaushi, një zyrtare në Bashkinë e Roskovecit, ishte një emër pothuajse i panjohur për publikun, deri në momentin kur Gazment Bardhi denoncoi se ajo, përmes të ëmës Vjollca Caushi, kishte përfituar grante për ndërtimin e një bujtine.
Zegjine Çaushi iu përgjigj Bardhit me një video ironike, të cilat i kishte të shpeshta gjatë gjithë fushatës, sa herë që Bardhi sulmon Ballukun. Kjo e fundit e përdori Zegjine Çaushin për të ironizuar kundërshtarin e saj kryesor në Fier, teksa në këtë mënyrë Zegjineja përfitonte promovim nga mediat pranë Qeverisë.
Por, duket se pasi e përmbushi “misionin”, ku arriti të futej në Kuvend, ndoshta edhe me ndikim nga lart, për shkak se mori mandatin e deputetes pas dorëheqjes së të tjerëve, Zegjine Çaushi ka hequr dorë nga videot ironizuese me Bardhin.
Teksa i drejtohej sot për herë të parë Kuvendit, e pyetur nga gazetarët, Zegjine Çaushi tha se historia me Gazment Bardhin ka mbaruar gjatë fushatës.
“Historia me Gaz Bardhin ka mbaruar gjatë fushatës. Nuk do e vijoni në parlament? Sigurisht që jo, patjetër që jo” – u shpreh Zegjine Çaushi.
.
Kujtojmë se në zgjedhjet e 11 Majit, Zegjine Çaushi arriti të merrte mandatin e 12-të të socialistëve në Fier me 4 674 vota preferenciale në total, teksa pas saj, ajo që e humbi mandatin ishte Maldrita Bardho me 4 610 vota. Diferenca mes tyre ishte vetëm 64 vota.
Pas rinumërimit, Zegjine Çaushit iu hoqën 48 vota, ndërsa kandidates Maldrita Bardhos iu shtuan 26 vota. Kjo ka sjellë që Bardho të shkojë 10 vota më shumë se sa Zegjine Çaushit duke i marrë kështu edhe mandatin e deputetit, të cilin e dorëzoi sërish.
