Banorë të qendrës historike të qytetit të Durrësit protestuan, paraditen e së mërkurës, kundër shpronësimeve dhe shembjes së banesave dhe bizneseve të tyre, për t’i hapur rrugë projektit të zhvillimit të parkut arkeologjik.
Sipas banorëve, të ndërtuara prej dekadash, shtëpitë e tyre janë pjesë e historisë së qytetit dhe bashkëjetesës së banorëve me objektet e trashëgimisë sonë kulturore.
Ata thonë se nuk janë njoftuar dhe as nuk janë përfshirë në asnjë fazë të procesit, ndërsa rastësisht kanë mësuar mbi vendimin e Qeverisë për shpronësimin e 74 familjeve me vlerën e 315 milion lekëve nga buxheti i shtetit, në fund të muajit gusht.
Ky vendim është marrë në kuadër të zbatimit të projektit TID (Transformimi i integruar i Durrësit) të Fondacionit Shqiptaro-Amerikan për Zhvillim.
Banorët kërkojnë t’iu mbrohet prona, ose të shpronësohen me vlerën realet të tregut, në të kundërt paralajmërojnë për akte ekstreme.
Ndërsa projekti synon të sjellë turizëm të shtuar dhe zhvillim të zonës, për këta banorë është kërcënim për ekzistencën.
Ata kërkojnë një zgjidhje të drejtë, përpara se fadromat të fshijnë përfundimisht pronën dhe historinë e tyre.
