Kryeministri Edi Rama ka ndarë në rrjetet sociale pamje nga shkolla 9-vjeçare “Kajo Karafili” në Pogradec, duke u shfaqur i kënaqur me klasat moderne dhe pajisjet bashkëkohore.
Në postimin e tij, Rama thekson se investimet në infrastrukturën shkollore janë pjesë e një programi kombëtar që garanton kushte të barabarta për të gjithë nxënësit.
Por realiteti në terren duket se është shumë larg këtyre “standardëve të larta” të kryeministrit. Prej katër vitesh, nxënësit e fshatit Donofrosë në bashkinë Dimal zhvillojnë mësimin në kushte skandaloze, në një lokal të marrë me qira nga bashkia. Sipas raportime të mediave shkolla 9-vjeçare e fshatit u mbyll me pretendimin se kishte rrezik shembjeje për shkak të një plasaritjeje në mur, por banorët denoncojnë se mbyllja u bë për të plotësuar tekat e një banori lokal.
Sot, oborri i shkollës përdoret për të kullotur delet, ndërsa në lokalin e improvizuar mësojnë vetëm 53 nxënës, të ndarë nga njëri-tjetri vetëm me perde, duke përballuar zhurmat e rrugës, klasave fqinje, bagëtive dhe madje edhe gjarpërinjve brenda ambienteve.
Problemet nuk përfshijnë vetëm zonat rurale të vendit por edhe shkollat e kryeqytetit . Pak ditë më parë, BoldNews.al publikoi videot e shkollës 9-vjeçare “Ahmet Gashi” në Laprakë, ku shihen mure të zhgarravitura, pllaka të thyera dhe karrige e tavolina të shkatërruara.
Ndërkohë edhe ministrja e Arsimit, Ogerta Manastirliu, njëlloj si lideri i saj nuk ndal propagandën në rrjetet sociale, duke u përqendruar në imazhet e shkollave të përmirësuara dhe duke e paraqitur si realitet të përgjithshëm atë që, në fakt, është vetëm një pjesë e vogël dhe e privilegjuar
