Në Fushë-Prezë, në rrugën e Rinasit emisioni “Stop” në Tv Klan takohet me zonjën Zamira Alija, e cila tregon se nuk regjistron dot tokën, arë të babait të saj, përfituar me AMTP para dy vjetësh.
Kjo tokë, e shfrytëzuar nga familja tani del që në mes të parcelës, ka mbivendosje me shtetasin Ismail Cako.
“Kjo tokë është shfrytëzuar ka qenë e mbjellë me misër dhe grurë nga prindërit e mi. Tani nuk kanë më fuqi që të certifikojnë pronën dhe ne ta bëjmë diçka që na intereson. Unë nuk po marr dot certifikatën, në hipotekë më thonë që keni një mbivendosje me Ismali Cakun. Ndërkohë që mbivendosja është në mes të parcelës, nuk e di se si ka hyrë dhe ka dalë. Ky person nuk është paraqitur fare, thjesht është një fasadë atje që thotë se këtu ka hyrë dikush, por nuk e vërtetojnë dot me asgjë”, thotë për mikrofonin e emisionit “Stop” qytetarja.
Zamira thotë se pas kësaj situate, është drejtori i ASHK-së Kamëz Vorë, Agron Cerri.
“Më thonë shko jepi një kafe Agron Cerri. Ndjehem e kërcënuar nga personat që ky njeh, më kanë kërcënuar familjen. Më kërkojnë që të bëja një akt noterial për të hequr dorë unë. Unë nuk e dija se nga se duhet të hiqja dorë, kur nuk ekziston diçka. Nga këto më del që ky zotëria është pjesë e grupit kërcënues dhe që del hapur për të mos më dhënë certifikatën”, shton denoncuesja.
“Stop” arriti të kontaktojë me këtë të fundit, për të pyetur, se pse nuk pajiset me certifikatë pronësie Nexhip Alija, por drejtori u shmang duke kërkuar, që gazetarja t’i shkojë në zyrë.
Kur kjo e fundit tentoi t’i shkonte në zyrë nuk u lejua. Roja sulmoi operatorin, kurse një person, që shoqëronte drejtorin e goditi në shpinë me celular gazetaren e emisionit “Stop”.
Rojet e sigurisë: Stop! Stop!
Gazetarja: Jemi me drejtorin!
Operatori: Jemi me drejtorin. Op, op, avash, ça ra? Pse më prek me dorë?
Rojet e sigurisë: Nuk ke të drejtë të hysh ashtu me vrap!
Operatori: Pse më prek me dorë?
Rojet e sigurisë: Nuk ke të drejtë të hysh!
Operatori: Fol me gazetaren, mo vëlla! Unë jam me atë.
Rojet e sigurisë: Dil jashtë..! (e shtyjnë) Jashtë! Jashtë!
Operatori: Prit një sekondë. se më ka rënë kjo e kameras, ta marr!
Rojet e sigurisë: Ta marrim ne.
Operatori: Shko e ma merr njëri të paktën, se e kam mjet pune!
Rojet e sigurisë: Ta marrim ne, pa merak!
E gjitha ka ndodhur përpara kamerave të institucionit, ku gazetarja është goditur dy herë nga personi që po ruante drejtorin.
Gazetarja: O drejtor po si më le kështu dhe nuk e mbajtje fjalën mor burrë.
Drejtori i ASHK Kamëz-Vorë, Agron Çerri: Domenika, tashi, se merresh vetë me këtë punë, më duhet pak kohë! Nuk e njoh problemin. Në qoftë se ti këmbëngul,bëj shkresë dhe të kthej përgjigje! Hajt!
Drejtoria e Kadastrës nxitoi të deklaronte se agresori nuk është punonjës i saj, por nuk shpjegoi, se pse të tillë persona janë brenda institucionit dhe çfarë nevoje ka drejtori, të mbrohet nga gazetarët me këta individëve./TvKlan
