Sali Berisha, gjatë konferencës me gazetarët, ka folur edhe për ngjarjen e rëndë kriminale të regjistruar mëngjesin e sotëm në Shkodër, ku dy persona mbetën të vrarë, ndërsa dy të tjerë u plagosën, pas një atentati mafioz.
Lideri demokrat tha se disa prej tyre kanë aktivë në fushatën elektorale të Edi Ramës dhe sipas tij, bandat kanë licensës nga kryeministri për të vrarë. Sipas tij, Shkodra është tërësisht në duart e krimit, për shkak të urrejtjes që ka Edi Rama ndaj këtij qyteti.
“Shkodra është në duart e krimit! Është tërësisht në duart e krimit! Unë kam deklaruar dhe në mënyrë të përsëritur, deklaroj se bandat kanë licencë për vrasjet nga Edi Rama. Pak kohë më parë, ndodhi një masakër tjetër që mori katër jetë. Dhe tani kjo është masakra tjetër. Para katër ditësh është vrarë një tjetër. Që të gjitha këto janë të lidhura me njëra-tjetrën. Shkodra është e tëra- për urrejtjen që ka Edi Rama ndaj saj- në orbitën e hakmarrjes, qërimit të hesapeve, sundimit nga bandat. Sot, thuhet se disa nga këta ishin aktivë në fushatën elektorale të Edi Ramës. Unë nuk merrem, në kuptimin e asaj që secili ka të drejtë të ketë bindjen e tij, por përdorimi i krimit për qëllime elektorale është ajo çka ne kemi thënë. Kartelet janë përdorur për qëllime elektorale dhe tani ata janë sundimtarë të vërtetë të Shkodrës. Breshëri në kafene, plagoset rëndë kamerierja, i uroj të shpëtojë… Janë tërësisht banda të lidhura me shtetin, të cilat qytetin e kanë si trofe të tyre.” – tha Berisha.
