Nga Boldnews.al
Tre gjyqtarë dhe një prokurore u vunë në shënjestër të kryeministrit Edi Rama gjatë muajve të verës, pasi, në vlerësimin e tij, ata dhanë vendime që cënonin rëndë nismën e qeverisë për të luftuar paligjshmërinë në terren.
Goditja publike e Ramës ndaj zyrtarëve të drejtësisë ishte e fortë, me kohëzgjatje disa javore, të cilat ishin tërësisht në disproporcion me vendimmarrjet paraprake të gjyqtarëve.
Megjithëse kryeministri nuk e ka për herë të parë që ndjek strategjinë e denigrimit të gjyqtarëve me emër të përveçëm, nisma e tij për të sulmuar prokuroren Elsa Gjeli dhe gjyqtarët administrativë Ligoraq Toshi, Klarent Demiri dhe Hazbi Balliu, duket se ishte “me qitje të largët”.
Kryeministri, me shumë mundësi, as i ka dëgjuar ndonjëherë më parë emrat e tyre dhe as e ka idenë se çfarë përfaqësojnë ata profesionalisht. Qëllimi i vërtetë i sulmit të Ramës ndaj gjyqtarëve u zbulua këtë të mërkurë (3 shtator 2025).
Në një aktivitet publik, Rama prezantoi skenarin e ri të burgosjes së qytetarëve: “Heqje lirie, burg, për ata që vjedhin ujin”, deklaroi ai me forcë në aktivitetin për “Reformën e dytë të Ujësjellësave”.
Duke filluar nga Tetori i këtij viti, çdo strukturë policore, hetimore apo inspektuese pritet të shpërndahet në territor, për të zbuluar ata që kryeministri i konsideron si “hajdutët e ujit”. Dhe, siç ka ndodhur edhe më parë, fushata e radhës do të shoqërohet me operacione spektakolare e arrestime të shumta, për të treguar në publik se Rama ka vendosur më në fund të bëjë shtet, pasi ka 12 vjet që qeveris vendin.
Fushata e arrestimeve të pritshme, natyrisht, do të kërkojë gjyqtarë të devotshëm, të cilët do të duhet t’i binden “fushatës së kryeministrit”. Në rast se gjyqtarët do të gjenden në kushtet e përgjegjshmërisë ligjore dhe nuk do të miratojnë arrestimet për “fakirët e ujit”, atëherë ata, me shumë mundësi, do të jenë subjekte të logoresë së kryeministrit në rrjetet sociale.
Kryeministri nuk e ka për herë të parë që përdor këtë model frikësimi dhe intimidi, para se ai të ndërmarrë “fushata kundër paligjshmërisë”.
Në vitet 2014-2015, gjyqtarë dhe prokurorë të veçantë, u gjendën nën sulmet publike të Edi Ramës, për vendimmarrje të ndryshme. Edhe në atë kohë, kreu i qeverisë gjeti disa vendime të dorës së dytë, për t’i bërë “shembull” negativ.
Gjyqtarët dhe prokurorët e morën mesazhin; ata nuk duhet të dilnin kundër vullnetit të “Sherifit të ri në qytet”. Pasi i intimidoi dhe frikësoi gjyqtarët, këta të fundit nuk bërë asnjë rezistencë ndaj arrestimeve masive të “Policisë së Saimir Tahirit”, duke mbushur qelitë e paraburgimit me “fakirët” e dritave dhe taksave.
Rama ia doli në atë kohë të vendoste nën zgjedhë gjyqtarët e prokurorët, edhe pse pati disa reagime, megjithëse sporadike, nga ish-Këshilli i Lartë i Drejtësisë dhe Prokuroria e Përgjithshme, dy institucione që, ligjërisht, menaxhonin dhe mbronin interesat e magjistratëve.
Tashmë, 10 vjet më pas, Rama iu rikthehet sërish sulmeve të gjyqtarëve, me synimin e pastër që këta të fundit të mos kundërshtojnë “burgosjen për ujin”.
Skenari i kryeministrit, afërmendsh që do të funksionojë edhe kësaj radhe, aq më tepër që interesat e magjistratëve mbrohen nga Këshilli i Lartë Gjyqësor e Këshillit i Lartë i Prokurorisë, dy struktura tërësisht amorfe dhe të frikësuara nga pushteti i Edi Ramës
