Forcat Operacionale të Policisë së Shtetit kanë arrestuar një person të shpallur në kërkim ndërkombëtar nga drejtësia italiane për pjesëmarrje në organizatë kriminale që trafikonte lëndë narkotike.
Në kuadër të operacionit të koduar “Operacionalja 65” është vënë në pranga shtetasi Luan Gripshi alias Rudin Gripshi, 52 vjeç, banues në Peqin.
“Ky shtetas ishte shpallur në kërkim ndërkombëtar nga Interpol Roma, pasi Gjykata e Apelit në Venecia, me vendimin e datës 03.04.2023, e ka dënuar me 4 vjet, 10 muaj e 14 ditë burgim, për pjesëmarrje në organizatë kriminale që trafikonte lëndë narkotike.” – thuhet në njoftim.
Policia thotë se Interpol Tirana po vijon procedurat në bashkëpunim me autoritetet italiane për ekstradimin e 52-vjeçarit.
Rudin alias Luan Gripshi nuk është një emër i padëgjuar në botën e krimit. Ai konsiderohej si kreu i një bande në Midlands të Britanisë së Madhe që u shpall fajtor për trafikun e 1 milion paundi kokainë. Anëtarët e kësaj bande u dënuan në vitin 2016 me 110 vite burg në total nga Gjykata e Briston, ku Rudin Gripshi u dënua me 13 vite heqje lirie.
Sipas drejtësisë britanike, grupi kishte krijuar një rrjet të mirëfilltë për shpërndarjen e kokainës. Hetimet kishin filluar në vitin 2014 dhe zgjatën rreth 18 muaj, kur u arrestua shqiptari Edmor Bashalliu për pastrim parash.
Lidhjet e grupit kriminal të përbërë nga shqiptarë dhe anglezë ishin krijuar nga Rudin Gripshi, i cili kishte hyrë në Britani të Madhe në mënyrë të jashtëligjshme dhe jetonte në Northampton.
Në dhjetor të vitit 2022, ai përfundoi dënimin dhe u deportua në vendin tonë. Liria e tij duket se nuk ka zgjatur as 3 vite, duke u arrestuar sërish, këtë herë për llogari të Italisë.
