Deputetja e Partisë Demokratike, Albana Vokshi, ka përsëritur akuzat ndaj kryeministrit Edi Rama dhe ish-ministres së Shëndetësisë, Ogerta Manastirlliu, lidhur me tenderat e shpallur “sekret” gjatë pandemisë së COVID-19.
Në një reagim në rrjetet sociale, Vokshi shkruan se kanë kaluar 5 vite nga denoncimi i saj publik dhe kallëzimi i depozituar në SPAK, por ende nuk është marrë asnjë masë, ndërsa sipas saj, abuzimi me paratë e shëndetit të qytetarëve ka mbetur i pandëshkuar.
Sipas deputetes demokrate, për shkak të keqmenaxhimit dhe abuzimeve në shëndetësi, niveli i vdekshmërisë në Shqipëri gjatë pandemisë COVID-19 ishte më shumë se dyfishi i mesatares së vendeve të Bashkimit Europian.
Postimi i plotë:
5 vite pa drejtësi!
Në kulmin e pandemisë, Rama–Manastirlliu shpallën “sekret” tenderat e maskave dhe mjeteve mbrojtëse, duke i blerë me dyfish e trefish të çmimit real, ndërsa qytetarët s’kishin mundësi të siguronin kura jetike.
Denoncova publikisht këtë krim!
Depozitova një Kallzim në SPAK për këtë aferë kriminale ku u abuzua me paratë e shëndetit të qytetarëve.
5 vite më pas, asgjë nuk ka ndodhur. Rama e Manastirlliu nuk janë hetuar, ndërkohë që shumë qytetarë humbën jetën për shkak të këtij abuzimi. Për shkak të abuzimeve marramendëse, niveli i vdekshmërisë në Shqipëri gjatë COVID19 ishte më shumë se dyfishi mesatares së vendeve të Bashkimit Europian.
Ky është krim i mbuluar me “sekret shtetëror”. Një vjedhje e bërë mbi kurrizin e shqiptarëve në ditët e tyre më të vështira.
Shqiptarët meritojnë drejtësi!
Abuzuesit duhet të ndëshkohen për cdo qindarkë të parave të shëndetit të vjedhur!
