Në mesditën e sotme, Shqipëria u përfshi nga një stuhi e fortë shiu dhe ere, e cila shkaktoi përmbytje, dëme materiale dhe vështirësi të mëdha në qarkullim. Në kryeqytet, Tirana, era dhe reshjet e dendura rrëzuan pemë, dëmtuan objekte metalike e llamarine dhe bllokuan qarkullimin në zona si ish-Stacioni i Trenit, Shkolla e Bashkuar, Komuna e Parisit, “5 Maji”, Kombinat dhe zona e Oxhakut.
Si pasojë e motit të keq, 20 persona u lënduan lehtë dhe u dërguan në Spitalin e Traumës, ku 10 prej tyre mbeten ende të shtruar. Reshjet intensive dhe era e fortë shkaktuan gjithashtu vonesa dhe anulime fluturimesh në Aeroportin e Rinasit, ku 14 fluturime në mbërritje dhe 7 në nisje u vonuan, ndërsa 5 fluturime janë anuluar.
Situata ka prekur edhe qytetet bregdetare dhe ato të veriut. Në Vlorë, rrugët kryesore u përmbytën dhe trafiku u paralizua për shkak të reshjeve intensive dhe erës që përhapte pluhur. Në Lezhë, niveli i ujit arriti mbi 30 cm në disa zona, duke izoluar hyrjet e pallateve dhe bllokuar trafikun drejt Shëngjinit.
Në Durrës, reshjet intensive dhe era e fortë shkaktuan përmbytje në disa akse kryesore, ndërsa në portin e qytetit një kabllo lidhëse e tragetit Durrës–Bari “Francesca” u shkëput, duke rrezikuar përplasjen, por situata u menaxhua me profesionalizëm dhe trageti vijoi lundrimin.
Probleme u regjistruan edhe në Fier, ku stuhia shkaktoi ndërprerje të energjisë elektrike në disa zona dhe rrëzim pemësh në aksin Fier–Cakran, si dhe në Sarandë, ku autoritetet ndaluan daljen në det për mjete turistike dhe peshkarexha për shkak të erërave të forta.
Ndërsa qytetarët përpiqen të shmangin ujërat dhe pemët që bien mbi rrugë, disa kanë vënë re se ndërhyrjet e bashkive duket se vijnë “pak pas” kur situata bëhet emergjente. Për shembull, kanalizimet shpesh janë të mbushura dhe pastrimi duket se varet më shumë nga moti sesa nga planet e mirëfillta të administratës lokale.
Instituti i Gjeoshkencave bën me dije se reshjet intensive dhe stuhitë priten të vazhdojnë edhe të dielën në qarqet Lezhë, Durrës, Tiranë, Shkodër, Dibër, Elbasan, Vlorë, Fier dhe Gjirokastër, ndërsa priten reshje mesatare në Kukës dhe disa zona të tjera të vendit. Shtrëngatat dhe reshjet intensive mund të shkaktojnë probleme në zonat urbane, në varësi të sistemit të kanalizimeve.
