Presidenti amerikan, Donald Trump, ka bërë një propozim të papritur për përfshirjen e forcave paqeruajtëse kineze në Ukrainë, duke mbështetur një ide të ngritur më herët edhe nga presidenti rus, Vladimir Putin, raporton Financial Times.
Sipas burimit, gjatë një takimi në Shtëpinë e Bardhë me liderë evropianë dhe presidentin ukrainas Volodymyr Zelensky, Trump sugjeroi që Kina të ftojë forcat e saj paqeruajtëse për të monitoruar një zonë neutrale përgjatë vijës së frontit prej 1,300 kilometrash në Ukrainë. Ky opsion shihet si pjesë e një marrëveshjeje të mundshme për armëpushim me Rusinë.
Megjithatë, një zyrtar i lartë i administratës Trump e ka mohuar lajmin, duke e cilësuar si “tërësisht të rremë” dhe duke theksuar se nuk ka pasur asnjë diskutim për trupa kineze në Ukrainë.
Propozimi ka shkaktuar reagime të ashpra nga kryeqytetet evropiane dhe është refuzuar edhe më herët nga presidenti Zelensky, për shkak të mbështetjes së Pekinit për Moskën gjatë luftës.
Takimi i javës së kaluar në Uashington ishte pjesë e diskutimeve më të gjera për një armëpushim të mundshëm, garancitë perëndimore të sigurisë për Ukrainën dhe krijimin e një strukture të qartë për paqen pas përfundimit të konfliktit.
