Presidenti Donald Trump zhvilloi biseda telefonike me liderët e Ukrainës dhe Rusisë ditën e shtunë, me rastin e 4 Korrikut, ditës së Pavarësisë së Shteteve të Bashkuara.
Presidenti Volodymyr Zelensky tha se kishte zhvilluar një “bisedë shumë të mirë” me Trump, gjatë të cilës, përveç urimeve për 250-vjetorin e pavarësisë, u diskutua edhe për situatën në vijat e frontit.
Zelensky theksoi se ka një “perspektivë reale” për t’i dhënë fund konfliktit dhe se Trump kishte rënë dakord për të vijuar bisedimet gjatë samitit të ardhshëm të NATO-s në Ankara, nga data 7 deri më 8 korrik.
Nga ana tjetër, edhe Kremlini konfirmoi se presidenti Vladimir Putin zhvilloi një bisedë telefonike me homologun amerikan.
Këshilltari i presidentit, Yuri Ushakov saktësoi se gjatë bisedës që zgjati 1 orë e 25 minuta, Putin e uroi Trump për festën.
“Natyrisht, presidenti preku edhe çështjen e territoreve ukrainase, edhe në prag të pjesëmarrjes së ardhshme të Trump në samitin e NATO-s në Turqi”, tha Ushakov.
Ai shtoi se Trump kishte riafirmuar gatishmërinë e tij për të lehtësuar fundin sa më parë të armiqësive dhe për të kërkuar zgjidhje për të tejkaluar krizën.
Bisedat telefonike u zhvilluan pak ditë pasi një sulm madhor rus në Kiev vrau të paktën 30 persona dhe plagosi disa dhjetëra të tjerë. Ndërsa mbrëmjen e së premtes, forcat ukrainase kryen sulmet e tyre ndaj infrastrukturës së naftës në afërsi të Shën Pjetërburgut.
