Gjykata e Tiranës ka dënuar pak ditë më parë autorët e një tentative mashtrimi ku ata u prezantuan si kryebashkiaku i Tiranës, Erion Veliaj, për të zhveshur një ndërtues nga 70 mijë euro.
Të pandehurit Xhensil Qefa-Hida dhe Leonard Xhika u gjykuan për “mashtrim” të mbetur në tentativë dhe u dënuan me nga 3 vite burg secili, ndërsa për shkak të gjykimit të shkurtuar, dënimi u ul në 2 vite dhe për Xhikën burgun e la për 4 vite në Shërbim Prove.
Xhensil Qefa-Hida rezultoi si “truri” i skemës dhe u dënua në mungesë pasi nuk është arrestuar. Ai kontaktoi biznesmenin duke u hequr si Erion Veliaj dhe udhëzoi Leonard Xhikën të merrte paratë duke i dhënë një telefon të përkohshëm për t’u hequr pas dorëzimit. Sipas deklarimeve të Xhikës, shumën që do të dorëzonte ishte 20 mijë euro, nga të cilat mund të mbante 3 mijë për vete.
Në të njëjtën dosje u gjykuan edhe tre persona të tjerë, Mikel Panxhi, Xhonatan Xhaferri dhe Petro Ferzaj, të cilët u dënuan me nga 8 muaj burg për “moskallëzim krimi”.
Ngjarja ndodhi më 26 shtator 2023 kur një biznesmen në kryeqytet mori një mesazh në “Telegram” ku thuhej “Përshëndetje! Jam Erion Veliaj. Një mikut tim i nevojiten 70 mijë euro. Rregullohemi bashkë diku tjetër”.
Autorët i kërkuan shumën fillimisht në Vlorë, më pas në një restorant pranë Lushnjës dhe në fund në parkimin e një qendre tregtare pranë Kthesës së Kamzës në Tiranë, por falë ndërhyrjes së policisë, tentativa u zbulua dhe u ndalua para se të kryhej zhvatja.
