Kryebashkiaku i Tiranës, Erion Veliaj, edhe pse i arrestuar dhe nën hetim nga SPAK, vazhdon të komunikojë me qytetarët përmes TikTok-ut. Ironia e madhe? Pikërisht në atë platformë që kryeministri Rama e ka shpallur “të dëmshme”.
Në videon e fundit, Veliaj shfaqet me tone enigmatike, duke thënë:
“Je kaq i qetë. Modaliteti i heshtur është aktiv sepse nuk më pëlqen më. Kur të flas unë, ti do jesh lajm i fundit.”
Nuk dihet se për kë është ky mesazh, por në një kohë kur Rama i trembet ndikimit të TikTok-ut mbi të rinjtë, e keqja mund ti vi nga tjetër kush.
Veliaj u arrestua në zyrën e Bashkisë më 10 shkurt si i dyshuar për kryerjen e veprës penale të “Korrupsioni pasiv i funksionarëve të lartë shtetërorë ose i të zgjedhurve vendorë”, kryer në bashkëpunim (9 herë) dhe “Pastrimi i produkteve të veprës penale ose veprimtarisë kriminale”.
Sipas SPAK, nga të dhënat konkrete të mbledhura deri në këtë fazë të hetimit paraprak, rezulton se nga personat nën hetim, specifikisht Veliaj edhe bashkëshortja e tij, Ajola Xoxa, është ideuar, krijuar dhe vënë në funksionim një mekanizëm që ka synuar dhe ka bërë të mundur marrjen e përfitimeve të parregullta, të cilat burojnë nga fondet publike që administrohen nga Bashkia Tiranë, përmes titullarit të saj, me qëllim pasurimin personal të këtij të fundit dhe familjes së tij, përmes veprimeve të kamufluara dhe të kundërligjshme.
