Deputeti socialist Erion Braçe ka reaguar lidhur me faktin që zëvendëskryeministrja Belinda Balluku vijon të qëndrojë në detyrë, ndonëse është marrë zyrtarisht e pandehur nga SPAK me akuzën e shkeljes së barazisë në tendera.
Në një intervistë në “Kjo Javë”, Braçe theksoi se çdo vendim për shkarkimin e saj është kompetencë e drejtpërdrejtë e kryeministrit Edi Rama.
“Zyrtarisht e pandehur nuk do të thotë zyrtarisht e fajshme. Në momentin që ka një akuzë penale nga SPAK, politika duhet të ndalet. Çdo ndërhyrje politike e politizon procesin dhe nuk i bën mirë drejtësisë,” deklaroi ai.
I pyetur nëse Belinda Balluku duhet të vijojë të qëndrojë në detyrë, Braçe u përgjigj: “Është çështje që i takon kryeministrit, jo mua. Vendimi për emërim apo shkarkim është atribut i kryeministrit, në çdo rast.”
