Izraeli ka njoftuar të shtunën se po përgatitet të zhvendosë civilët palestinezë nga zonat e luftimeve në jug të Gazës, ndërsa paralajmëron një ofensivë të re ushtarake në pjesët më të populluara të territorit.
Zëdhënësi i ushtrisë izraelite, Avichay Adraee, deklaroi se nga e diela do të shpërndahen tenda dhe pajisje të tjera strehimi për banorët që do të largohen nga zonat e luftimeve drejt jugut, në atë që ushtria e cilëson si “zona të sigurta”. Pajisjet do të kalojnë përmes pikës kufitare të Kerem Shalom dhe nën mbikëqyrjen e OKB-së dhe organizatave të tjera ndërkombëtare të ndihmës, pas kontrolleve të Ministrisë së Mbrojtjes së Izraelit.
Ky njoftim vjen pas paralajmërimeve të Izraelit për marrjen e kontrollit të qytetit të Gazës, qendra më e madhe urbane e enklavës me rreth 2.2 milionë banorë, një plan që ka shkaktuar shqetësime ndërkombëtare.
Ndërkohë, familjet e pengjeve izraelite kanë shpallur një “ditë kombëtare ndalese” për të shprehur shqetësimin pas 22 muajsh lufte, duke theksuar rrezikun për 50 pengjet e mbetur në Gaza, prej të cilëve mendohet se vetëm 20 janë ende gjallë. Një grup që përfaqëson këto familje bëri thirrje për mobilizim mbarëkombëtar dhe për t’i rikthyer pengjet në shtëpi.
Sipas agjencisë së mbrojtjes civile në Gaza, të paktën 39 persona kanë humbur jetën nga sulmet izraelite të së shtunës, ndërsa bombardimet intensive në lagjet e qytetit rrezikojnë jetën e civilëve që ende ndodhen aty.
