Gazment Bardhi akuzon Belinda Ballukun si nismëtaren kryesore për të dërguar forcat e policisë dhe ushtrisë në godinën e televizionit News 24, duke mos lejuar gazetarët të futen në redaksi dhe se prej dy ditësh televizionit i është fikur sinjali.
Sipas Bardhit, Balluku ka urdhëruar boshatisjen e News24 në shenjë hakmarrje, pas publikimit të lajmit se ministres pritet t’i komunikohen akuzat shumë shpejt nga SPAK.
Bardhi e lidh këtë situar me emrin e Ermal Nasufit, i cili rezulton se është kryetar i Këshillit Mbikëqyrës të shoqërisë “KAYO” që ka marrë nën administrim godinën, dhe njëkohësisht është edhe drejtori i kabinetit të Belinda Ballukut. Po ashtu, Bardhi i përmend Nasufit se vëllai i tij ka marrë një tender rreth 900 mijë euro nga kryetari i bordit të ARRSH-së.
Sipas Bardhit, sulmi ndaj News24 synon të heshtë zërat kritikë dhe të mbrojë interesat korruptive të pushtetit, duke shkelur marrëveshjet ligjore për qiradhënie dhe duke ushtruar presion ndaj gazetarëve dhe institucioneve të drejtësisë.
Postimi i plotë i Gazment Bardhit
Në datën 8 Gusht 2025, ora 18:40, Gazeta Shqiptare, pjesë e “Focus Group Media”, publikoi shkrimin për komunikimin e pritshëm të akuzës nga SPAK për ZëvendësKryeministren Belinda Balluku.
Në datën 9 Gusht 2025, ora 07:00, shoqëria shtetërore “KAYO” sh.a., ku rezulton se kryetar i Këshillit Mbikëqyrës është Ermal Nufi urdhëron zabtimin e të gjitha pronave ku ushtrojnë veprimtarinë mediatike News 24, Balkanweb, Gazeta Shqiptare dhe Panorama, pavarësisht se pjesa dërrmuese e tyre as nuk i kanë kaluar në administrim shoqërisë shtetërore “KAYO” sh.a. (pronat janë me qira të vlefshme deri në vitin 2033, me nje vlerë vjetore qiraje 180 mijë euro, siç konfirmonte edhe vetë MEKI në një deklaratë zyrtare).
Ermal Nufi është njëkohësisht drejtori i kabinetit të Belinda Ballukut dhe do të kujtohet vetëm për faktin se si kryetar i Bordit të ARRSH, i dha kompanisë së vëllait të tij tender rreth 900 mijë euro, e denoncuar kjo edhe nga emisioni “Vetting” në News24.
Tani kjo shoqeria “KAYO” sh.a., ku Ermal Nufi, është kryetar i Këshillit Mbikëqyrës, urdhëron një kriminel të njohur si Ardi Veliu, që të zaptojë të gjitha ambientet e punës së News24, Balkanweb, Gazetës Panorama dhe Gazetës Shqiptare, duke mos i lejuar gazetarët dhe stafin mediatik që të punojnë as në ambientet që shoqëria mediatike i ka me qira të vlefshme nga shteti deri në vitin 2033.
Pse? Sepse qëllimi nuk është të marrin në administrim një pronë shtetërore, por të heshtin çdo zë mediatik kritik ndaj tyre, me shpresën se presioni me banda ndaj një prokurori të SPAK do të funksionojë. E keni gabim! Erion Veliaj u bë shkaku për të cilin u mbyll Agon Channel. Fatin e tij e dini. Ai do jetë edhe fati juaj!
