Policia e Fierit ka dalë me një komunikatë të dytë në lidhje me aksidentin e regjistruar mbrëmjen e së premtes në vendin e quajtur “Qafa e Koshovicës”, ku një automjet përfundoi i përmbysur jashtë rruge dhe shpërtheu në flakë, ndërsa mbetën të plagosur 4 persona.
Sipas autoriteteve, nga hetimet ka rezultuar se shkak i aksidentit është bërë një automjet tjetër, i cili i ka prerë rrugën automjetit tip “Mercedez Benz”. Pas aksidentit, makina tjetër është larguar nga vendi i ngjarjes.
Policia thotë se e ka a<rrestuar shoferin që shkaktoi aksidentin, shtetasin M. A., 45 vjeç, banues në Itali, për veprat penale “Shkelja e rregullave të qarkullimit rrugor” dhe “Largimi nga vendi i aksidentit”.
“Në vijim të informacionit të dhënë në lidhje me aksidentin rrugor, të ndodhur në datë 08.08.2025, në vendin e quajtur “Qafa a Koshovicës”, ku mbetën të dëmtuar katër shtetas, informojmë se në vijim të veprimeve hetimore dyshohet se shkak i aksidentit është bërë ndërprerja e rrugës nga automjeti që drejtohej nga shtetasi M. A., i cili është larguar nga vendngjarja. Në përfundim të veprimeve procedurale specialistët e Sektorit të Qarkullimit Rrugor bënë arrestimin në flagrancë të shtetasit M. A., 45 vjeç, banues në Itali, për veprat penale “Shkelja e rregullave të qarkullimit rrugor” dhe “Largimi nga vendi i aksidentit” – thuhet në njoftim.
Materialet procedurale i janë referuar Prokurorisë së Fierit, për veprime të mëtejshme.
