Mbrojtësi i Napolit, Amir Rrahmani, ka folur për mikrofonat e Radio Crc rreth gjendjes së skuadrës dhe përgatitjeve për sezonin e ri.
Ai theksoi se ekipi është ende në fazën fizike, por po i kushton vëmendje edhe aspektit taktik.
“Gjatë këtyre ditëve po punojmë ende në aspektin fizik, por po insistojmë edhe në pjesën taktike, atë që nevojitet për përgatitjen e ndeshjeve. Nesër kemi një ndeshje të vështirë dhe duhet ta përgatisim mirë. Duhet të jemi më të kujdesshëm në mbulim, të ndjekim më mirë kundërshtarët dhe të jemi më të rrezikshëm në sulm,” tha Rrahmani, duke shtuar se lodhja nga kampi përgatitor është një faktor që duhet marrë parasysh.
Për fazën mbrojtëse, ai u shpreh se gjithçka varet nga përqendrimi dhe presioni i lartë i skuadrës: “Kur e gjithë skuadra bën presion fort dhe lart, për ne mbrojtësit bëhet më e thjeshtë.”
Rrahmani foli edhe për partneritetin e tij në mbrojtje me Beukeman, të cilin e vlerësoi për inteligjencën dhe aftësinë për t’u përshtatur shpejt me stilin e lojës.
Duke parë drejt ndeshjes me Gironën, mbrojtësi kosovar paralajmëroi një sfidë të fortë: “Ata janë një skuadër shumë e fortë, me lojtarë cilësorë. Po përpiqemi ta përgatisim sa më mirë.”
Ai përfundoi duke theksuar atmosferën pozitive në dhomën e zhveshjes dhe gatishmërinë e skuadrës për një sezon të ngarkuar: “Nuk ka vetëm një lider, të gjithë ndihmojmë njëri-tjetrin dhe sidomos lojtarët e rinj që vijnë.”
