Deputetja e Partisë Demokratike, Jorida Tabaku, ka reaguar pas vendimit të SPAK për marrjen të pandehur të zëvendëskryeministres Belinda Balluku në lidhje me hetimet për tenderin e tunelit të Llogarasë.
Në një deklaratë në rrjetet sociale, Tabaku u shpreh se ky është momenti që tregon realitetin e një qeverie të mbërthyer nga korrupsioni.
“Nga sot, Shqipëria ka një zëvendëskryeministre të pandehur dhe një tjetër në kërkim ndërkombëtar. Kjo është fotografia reale e një qeverie që prej vitesh fshihet pas propagandës, ndërsa korrupsioni ka zëvendësuar meritën, ligjin dhe përgjegjësinë,” – shkruan Tabaku.
Ajo thekson se tenderi i tunelit të Llogarasë, i denoncuar më shumë se një vit më parë nga Gazment Bardhi, është vetëm “maja e ajsbergut” e një zinxhiri aferash që përfshijnë edhe projektet e aeroportit të Vlorës dhe blerjet e energjisë.
Tabaku kërkon dorëheqjen e menjëhershme të Ballukut:
“Një zëvendëskryeministre e pandehur nuk mund të përfaqësojë interesin publik dhe të administrojë tendera që peshojnë miliarda nga taksat e shqiptarëve.”
Deputetja demokrate shton se përgjegjësia nuk është vetëm individuale, por edhe politike, duke e konsideruar Kryeministrin Edi Rama si “arkitektin e një sistemi ku korrupsioni është bërë metodë qeverisjeje.”
Në përfundim, Tabaku apelon për një drejtësi të barabartë për të gjithë dhe për thyerjen e sistemit që, sipas saj, ka marrë peng vendin:
“Ky është momenti për të rikthyer shpresën se politika mund të jetë në shërbim të qytetarëve, jo mbi ta.”
Postimi i Tabakut:
