Një tjetër vendim skandaloz i Këshillit Kombëtar të Territorit dhe Ujit ka ndezur alarmin urbanistik në jug të vendit: leja për ndërtimin e një kulle 32-katëshe në mes të Sarandës, një qytet tashmë i zhytur në kaosin ndërtimor dhe bllokimin infrastrukturor.
Projekti me emrin “Saranda Tower”, përfshin një strukturë kolosale me 32 kate mbi tokë, 9 kate shtesë dhe 4 kate nëntokë – në zemër të qytetit, pikërisht në atë segment ku rrugët ngushtohen, ku trafiku veror është bërë makth dhe ku pamja e detit është i vetmi aset natyror që i ka mbetur qytetit bregdetar.
Por leja për këtë “kullë të betonit” nuk është thjesht një projekt urbanistik. Pas saj qëndron një emër i njohur për publikun dhe për prokuroritë: Shefki Karamuça, ish-kryetar i Bashkisë së Vorës dhe figurë e vjetër politike e LSI-së. Ai është përfituesi përmes kompanisë së tij “G&P” sh.p.k.
Leje pa zë qytetar dhe pa transparencë
Vendimi për lejen u dha në maj 2025 – në kulmin e sezonit turistik, kur zhurma, nxehtësia dhe fluksi i pushuesve e bëjnë të pamundur mobilizimin e komunitetit vendor. Asnjë dëgjesë publike, asnjë analizë ndikimi mjedisor, asnjë konsultim me qytetarët. Një akt i qartë i planifikimit autoritar dhe klientelist, që shkel mbi interesin e banorëve të Sarandës.
Zona ku do të ngrihet “Saranda Tower” ndodhet në qendrën e qytetit, në një kodër të pjerrët dhe të tejngarkuar, ku çdo ndërhyrje voluminoze përkthehet në katastrofë vizuale, funksionale dhe urbane. Nëse kjo kullë ngrihet, qindra banorë dhe turistë nuk do ta shohin më detin, por vetëm hijen e një godine që simbolizon pazaret mes ndërtimit dhe pushtetit.
Kush është Shefki Karamuça? Një emër me histori abuzimesh dhe konflikti interesi
Emri i Shefki Karamuçës nuk është i panjohur. Ai ka mbajtur postin e kryetarit të Bashkisë së Vorës në vitet 1999-2003 dhe më vonë është rikthyer në pushtet në mënyrë të pazakontë.
Në vitin 2020, pas dorëheqjes së nënkryetares së Bashkisë, Laureta Omeri, dhe më pas të kryetarit Hekuran Brahimaj, Karamuça vetëshpallet kryetar i bashkisë pa kaluar fare nga Këshilli Bashkiak, një veprim që ngriti dyshime për manipulim të procedurave administrative.
Menjëherë pas marrjes së detyrës, ai filloi ndërtimin e një objekti privat ngjitur me Bashkinë e Vorës, pa leje, dhe më pas punësoi në bashki stafin e firmës së tij ndërtuese, të cilët sot zënë zyra me qira në godinën që vetë Karamuça ndërtoi.
Me pak fjalë, kryetari i bashkisë i jep vetes qira për zyra në godinën që ka ndërtuar pa leje një rast tipik i konfliktit flagrant të interesit dhe abuzimit me detyrën.
Karamuça dhe dosjet e abuzimeve në Vorë
Emisioni investigativ “Stop” dokumentoi dy raste abuzimi gjatë menaxhimit të pasojave të tërmetit në Vorë, që lidhen drejtpërdrejt me emrin e Shefki Karamuçës:
- Rasti i pallatit nr. 8 në lagjen “Demokracia”, që u shpall i dëmtuar pa qenë i tillë.
- Rasti i gllabërimit të 250 m² truall ndaj biznesmenit Hamid Mema, i cili kishte të gjithë dokumentacionin ligjor.
Saranda si trofe ndërtimi për klientelën politike
Leja për “Saranda Tower” është një tjetër provë se si qytetet shqiptare janë kthyer në trofe ndërtimi për klientelën politike, ku figura me të shkuar të dyshimtë ose me lidhje me pushtetin vjelin miliona në kurriz të qytetit dhe mjedisit.
Në vend që të mbrojë horizontin, trashëgiminë dhe frymëmarrjen urbane të Sarandës, shteti i hap rrugën betonit dhe interesave personale – dhe këtë herë, jo në periferi, por pikërisht në zemrën e qytetit./ Publik.al
