Pas eksperiencës së tij në Serie A, Tammy Abraham është transferuar te Besiktas. Aktualisht, sulmuesi anglez është i angazhuar me klubin turk në fazën kualifikuese të Europa League. Ndërsa ndodhej në Stamboll, ai ka marrë një lajm tronditës: shtëpia e tij në Londër është grabitur.
Futbollisti ndoqi ngjarjen në kohë reale, përmes një aplikacioni të sigurisë dhe kamerave të vëzhgimit të instaluara në banesë. Ai publikoi në Instagram një video ku duken grabitësit teksa largohen, duke shkruar:
“Një grup hajdutësh erdhi dhe më grabiti shtëpinë para disa ditësh, duke marrë disa sende me vlerë. Falë Zotit familja ime është mirë”.
Më pas shtoi: “Nëse dikush di apo ka dëgjuar ndonjë informacion, ju lutem më njoftoni. Do t’i gjej shpejt”.
Sipas “The Sun”, Abraham u njoftua nga aplikacioni i alarmit për një hyrje të paautorizuar në shtëpinë e tij në Londër. Ai u lidh menjëherë me sistemin e kamerave dhe pa tre persona me kapuç duke hyrë në pronë.
Në video, e postuar nga vetë lojtari, shihen grabitësit teksa ecin nëpër kopsht dhe largohen me një objekt të rëndë, që nuk është identifikuar saktësisht.
Sulmuesi, ish-lojtar i Milanit dhe Romës, telefonoi menjëherë policinë, por kur forcat e rendit mbërritën në vendngjarje, grabitësit kishin ikur.
Ngjarja ndodhi në një moment të rëndësishëm për Abraham, i cili sapo ka debutuar zyrtarisht me Besiktas dhe po përgatitet për sfidën vendimtare ndaj Shakhtar Donetsk, ku duhet të përmbysë disavantazhin 4-2 të pësuar në shtëpi.
