Në një objekt industrial në Montanaso Lombardo, është zbuluar një plantacion kanabisi, ku policia lokale gjeti mbi 200 bimë kanabisi dhe rreth 15 kilogramë lëndë narkotike të gatshme për treg.
Mediat italiane shkruajnë se operacioni antidrogë, i zhvilluar të hënën pasdite, çoi në arrestimin e dy personave, një shqiptari dhe një francezi, të cilët u gjetën të fshehur nën dyshemenë e kapanonit dhe rezultuan të dy me precedentë penalë për shpërndarje droge.
Brenda kapanonit, policia hasi një impiant të sofistikuar teknologjik: pesë dhoma të dedikuara për kultivimin, ndriçim me llamba natriumi, sisteme ajrosjeje dhe ventilimi, ambiente për tharjen e bimëve, peshore precize, pajisje për paketim dhe një sistem aktiv të videombikëqyrjes. Një zinxhir i plotë prodhimi i kanabisit, nga fara deri te produkti i gatshëm për shitje.
Vlera e strukturës llogaritet rreth 300 mijë euro, por sipas hetuesve mund të kapërcejë 600 mijë euro, duke marrë parasysh nivelin e sofistikimit dhe kostot e ndërtimit.
Kapanoni, i marrë me qira prej rreth një viti dhe i regjistruar në emër të një gruaje banuese në Montanaso Lombardo, kishte rënë në syrin e hetuesve pas një denoncimi për lëvizje të dyshimta.
Gjatë një inspektimi paraprak, policët kishin ndjerë një erë të fortë kanabisi që vinte nga brenda ndërtesës. Kjo çoi në një sërë vëzhgimesh të fshehta, ku u konstatua një lëvizje e vazhdueshme personash që hynin dhe dilnin nga objekti.
Hetuesit po përpiqen të identifikojnë financuesit, organizatorët dhe kanalet e shpërndarjes, si dhe të verifikojnë mundësinë e ndonjë lidhjeje të paligjshme me rrjetin elektrik të bizneseve përreth.
