Dëshmia për llogari të SPAK e një 25-vjeçari nga Gramshi, i cili u gjet në Shkodër në një aksion anti-kanabis, është vënë në pikëpyetje gjatë seancës paraprake kundër 14 personave, shumica kushërinj me njëri-tjetrin.
Shkak është bërë krahasimi i tabulateve telefonike mes të akuzuarit Aleksandër Rrasa dhe Aurel Fejzo, i cili më herët kishte dëshmuar se ishte mashtruar për punë, por ndërkohë e dërguan në parcela hashashi.
Një version i tillë e kishte bindur SPAK-un më herët se, veç kultivimit të drogës, gjendej edhe përpara dyshimeve për trafik të të rriturve. Por në gjyqin me dyer të mbyllura, prokurorja ka kërkuar kohë për të plotësuar hetimet dhe për t’u bindur nëse ka apo jo trafik të të rriturve.
Bëhet fjalë për episodin e rekrutimit të të riut, të cilit iu premtua se do të paguhej 2500 lekë dita, por që përfundoi si fermer hashashi.
Në dosje, SPAK përmend se i riu ishte rekrutuar nga Artan Shpati, Aleksandër Rrasa dhe Mhill Shpata, me premtimin se do të punonte në bujqësi. Për këtë, bazohej në dëshminë e Fejzos, i cili pati statusin e të penduarit me rrëfimin e tij, ku tregonte se si disa persona e pikasën në këndin e stërvitjes së grupmoshave për futbollistët dhe e pyetën: “A ke nevojë për punë?” “Unë thashë po,” – tregonte Fejzo. Një përgjigje që pasoi udhëtimin e tij nga Gramshi drejt fshatrave të Shkodrës, ku punoi për të hapur gropa e për të mbjellë kanabis sativa.
Ndërkohë që kur u kthye në banesë, i tha të ëmës se kishte punuar në Greqi dhe i la asaj në tavolinë një mijë euro.
Por kur fjala e tij është kundër 14 shtetasve që janë nën akuzë nga SPAK për grup kriminal dhe kultivim droge, për të, prokuroria kërkoi kohë për vazhdimin e hetimeve, për të sqaruar se çfarë roli ka pasur në kultivimin e drogës në kuadër të grupit që përbëhet nga 14 persona. Ata akuzohen nga dëshmitari se përgatitën gati 1 ton hashash që dërgohej nga Thethi dhe fshatrat e Dukagjinit.
Në seancë, prokurorja ka kërkuar që të kryejë veprime të tjera shtesë, siç është ballafaqimi mes Fejzos dhe dy prej të pandehurve të tjerë. Seanca e radhës do të mbahet në shtator./TCH
