Me urdhër të Edi Ramës, Policia e Shtetit ka shtrirë në të gjithë territorin aksionin për ndërtimet pa leje, të cilat shpesh herë po keqpërdoren për qëllim gjobëvënie.
Në shumicën e rasteve uniformat blu por edhe IKMT po veprojnë me dy standarde, ku miqtë me lidhje të ngushta me pushtetarët por edhe oligarkët favorizohen duke mos u prekur bizneset e tyre të cilat shpesh herë janë në shkelje të ligjit.
E kundërta ndodh me bizneset e qytetarëve të cilët jo vetëm u mbyllet aktiviteti por edhe ndiqen penalisht pavarësisht se aktiviteti i tyre mund të jetë në përputhje me ligjin.
Një rast tipik “gjobënëvie” ka ndodhur ditën e sotme ku policia e shtetit me urdhër nga lart ka mbyllur aktivitetin e firmës “Delvina Gas”, pavarësisht se nuk rezulton asnjë shkelje ligjore.
“Ky aktivitet është ushtruar përherë në zbatim të çdo rregulloreje dhe detyrimi që buron nga Marrëveshja dhe Licensë Marrëveshja për Vendburimin e Delvinës, duke zbatuar me përpikmëri Programet e Punës dhe Buxhetit, si dhe Planit të Zhvillimit të vendburimit, programe këto që miratohen përherë nga partnerët tanë, dhënës së të drejtave të operimit në Vendburimin e Delvinës, shoqëria “Albpetrol” sh.a., Ministria e Infrastrukturës dhe Energjisë dhe Agjensia Kombëtare e Burimeve Natyrore”, thekson kompania “Delvina Gas”.
Në një reagim sqarues, kompania “Delvina Gas” thekson se ushtron aktivitetin në vendburimin e Delvinës në përputhje me legjislacionin në fuqi të fushës së hidrokarbureve në Republikën e Shqipërisë.
“Shoqëria “Delvina Gas Company”, degë e shoqërisë së huaj, është një shoqëri e regjistruar në Qendrën Kombëtare të Biznesit si degë e një shoqërie të huaj, konkretisht shoqërisë “Delvina Gas Company” Ltd, me seli në British Virgin Islands (BVI). Aktiviteti i shoqërisë “Delvina Gas Company”, degë e shoqërisë së huaj ushtrohet në Vendburimin e Delvinës në bazë të të drejtave dhe detyrimeve që i janë lëshuar nëpërmjet Marrëveshjes Hidrokarbure “Për prodhimin, zhvillimin dhe kërkimin e hidrokarbureve në Vendburimin e Delvinës” (hyrë në fuqi me VKM Nr.509, datë 08.08.2007), Instrumentit të Transferimit datë 22.08.2016, si dhe në përputhje me legjislacionin në fuqi të fushës së hidrokarbureve në Republikën e Shqipërisë.
Për të vijuar, duke ju referuar edhe Nenit 2.2, gërma “c” të Marrëveshjes Hidrokarbure të Vendburimit Delvinë (i cili në vetvete referon te Seksioni 3.2 i Licencë Marrëveshjes për Vendburimin Delvinë), përcaktohet e drejta e shoqërisë “Delvina Gas Company”, degë e shoqërisë së huaj, si mbajtëse e të drejtave dhe detyrimeve të operimit në Vendburimin e Delvinës, për të ndërtuar dhe instaluar të gjitha mjetet dhe pajisjet (duke përfshirë grumbullimin, trajtimin, tubacionet dhe mjetet e tjera të transportit) të kërkuara për operacionet hidrokarbure. Në bazë të pikës 35 të Nenit 2 të Ligjit Nr. 7749, datë 28.07.1993 “Për Hidrokarburet”, i ndryshuar, citohet shprehimisht se: “Zhvillim” është ndërtimi dhe instalimi i pajisjeve për prodhimin e hidrokarbureve dhe shpimi i puseve të shfrytëzimit, në zbatim të Marrëveshjes Hidrokarbure përkatëse dhe në përputhje me një plan zhvillimi të miratuar. (të cilin e disponojmë)”, thuhet në njoftimin sqarues të firmës “Delvina Gas”.
Më tej, kompani sqaron se aktiviteti është kryer në përputhje me ligjin dhe bazat ligjore të miratuara nga qeveria Rama.
BAZA LIGJORE:
1. Ligji Nr. 7749, datë 28.07.1993 Për Hidrokarburet (Kërkimi dhe Prodhimi), i ndryshuar;
2. VKM Nr. 509, datë 08.08.2007 për miratimin e Marrëveshjes Hidrokarbure të Vendburimit Delvinë;
3. Marrëveshja Hidrokarbure për Prodhimin, Zhvillimin dhe Kërkimin e Hidrokarbureve në Vendburimin e Delvinës, me datë efektive 24.08.2007;
4. Licencë Marrëveshje për Zhvillimin dhe Prodhimin e Hidrokarbureve në Vendburimin e Delvinës, datë 04.07.2007.
Kompania “Delvina Gas” përgënjeshtron lajmet e publikuara nga dy media pranë qeverisë të cilat në mënyrë dashakeqëse pretendojnë se ky aktivitet është i paligjshëm.
“Delvina Gas” sqaron se të gjitha punimet janë kryer me lejë dhe të ligjshmë, pasi impianti ka përfunduar 3 vjet më parë.
“Për sa më sipër, duke qenë se dy media të mëdha tashmë e kanë bërë lajm, duam të theksojmë se Impianti i Pastrimit nuk është TEC, por është pjesë integruese e pusit të gazit në Vendburimin e Delvinës. Ky impiant pastrimi ka 3 (tre) vjet që ka përfunduar ndërtimin dhe dy inxhinierët ishin thjesht mirëmbajtës të impiantit të pastrimit, i përfunduar tashmë së ndërtuari kohë më parë. Shoqëria “Delvina Gas Company”, degë e shoqërisë së huaj ka zbatuar çdo detyrim dhe rregullore duke ju përmbajtur hap pas hapi kuadrit ligjor në fuqi në sektorin hidrokarbur”, nënvizon kompania “Delvina Gas”.
- Çfarë njofton policia?
Dy persona janë vënë në pranga dhe dy të tjerë u shpallën në kërkim, pasi pretendohet se po ndërtonin pa leje një impiant gazi në Delvinë në pronë publike.
Në pranga janë vënë shtetasit Luan Metaj dhe Elton Malkaj, ndërsa pronari i kompanisë, S.M dhe administratori J.I u shpallën në kërkim.
Ata akuzohen për veprat penale “Ndërtimi i paligjshëm”, me qëllim përfitimi, dhe “Pushtimi i tokës”. Nga ana e IKMT-së është mbajtur procesverbali për konstatimin e kundërvajtjes dhe është bërë bllokimi i punimeve në këtë objekt.
“Në kuadër të masave të ndërmarra për parandalimin dhe goditjen e rasteve të ndërtimeve të paligjshme që cenojnë territorin dhe mjedisin, strukturat e Seksionit për Hetimin e Krimit Ekonomik dhe Financiar të DVP Vlorë, në bashkëpunim me inspektorët e IKMT Tiranë dhe me Inspektoratin e Mjedisit, ushtruan kontroll në një subjekt privat (kompani gazi), në Delvinë.
Gjatë kontrollit u konstatua se kjo kompani po ndërtonte një impiant gazi (TEC), në pronë publike, pa leje ndërtimi dhe zhvillimi nga organet kompetente.
Në përfundim të veprimeve të para procedurale, specialistët për Hetimin e Krimeve arrestuan në flagrancë shtetasit:
E. M., 31 vjeç, me detyrë përgjegjës i impiantit të gazit, dhe L. M., 53 vjeç, me detyrë përgjegjës i kantierit të ndërtimit, të dy të dyshuar për veprat penale “Ndërtimi i paligjshëm”, me qëllim përfitimi, dhe “Pushtimi i tokës”.
Gjithashtu, u shpallën në kërkim shtetasit:
S. M., 56 vjeç, pronari i kompanisë, dhe J. I., 36 vjeç, administratori i kompanisë, të dy gjithashtu të dyshuar për veprat penale “Ndërtimi i paligjshëm”, me qëllim përfitimi, dhe “Pushtimi i tokës”.
Nga ana e IKMT-së është mbajtur procesverbali për konstatimin e kundërvajtjes dhe është bërë bllokimi i punimeve në këtë objekt.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Sarandë, për veprime të mëtejshme”, njofton policia.
