Deputetja e PD-së, Ina Zhupa, ka deklaruar se mosmenaxhimi i situatës me zjarret tregon dështimin e shtetit.
Zhupa tha se Shqipëria ka buxhete të jashtëzakonshme për të përballuar këto situata, por sipas saj ato, vidhen.
Më tel ligjvënësja demokrate theksoi se emergjencat civile në Shqipëri janë vetë në emergjencë, pasi nuk kanë mjetet e duhura për të bërë shuarjen e zjarreve.
“Unë po e nis me situatën emergjente që është në zonën time elektorale. Delvina dhe Himara kanë qenë më të prekura, dhe siç e thatë ju në rastet më të veçanta janë evakuar dhe banorë. E gjithë kjo vjen si një rezultat i dështimit të shtetit, sepse situata të këtilla parandalohen, dhe në rast se nuk parandalohen dot sepse mund të jenë fatkeqësi natyrore, shteti merr masa për ti trajtuar ato në mënyrë profesionale dhe për të pasur gati emergjencat civile.
E them me bindje të plotë që emergjencat civile në Shqipëri janë vetë në emergjencë, nuk kanë mjetet e duhura për të bërë shuarjen e zjarreve. Në Shqipërinë që ne sot flasim, asnjë avion zjarrfikës nuk është në funksion të plotë të emergjencave civile, asnjë që të jetë në funksion për këtë mision që të shuajë zjarret kudo që ndodhen.
Ndërkohë që Shqipëria ka buxhete të jashtëzakonshme, por shumica e tyre abuzohet ose vidhet, siç thotë edhe raporti i kontrollit të lartë të shtetit. Dhe në fund nuk ka para për të vënë në dispozicion emergjencat civile.
Dy rezervuarët që janë në zonën e Delvinës, kush e ka përgjegjësinë që ato të lehtësonin edhe marrjen e ujit edhe nga helikopterët që na u vunë në dispozicion nga shtetet e BE. Pra një neglizhencë shtetërore, një mosvendosje e fondeve, në shërbim të emergjencave civile. Mungesa e mjeteve, ju keni parë denoncime të pafundme të qytetarëve.”, tha Zhupa në Syri TV.
