Deputetja e Partisë Demokratike, Ina Zhupa, ka reaguar ndaj videove të publikuara nga kreu i grupit parlamentar socialist, Taulant Balla, ku emigrantë shqiptarë shprehin mbështetje për qeverinë.
Sipas saj, këto materiale nuk mund të zbehin mesazhin që është dhënë nga protestat e fundit qytetare dhe mobilizimi i diasporës.
Në një postim në rrjetet sociale, Zhupa argumenton se pjesëmarrja e shqiptarëve brenda dhe jashtë vendit në protestat kundër qeverisë ka treguar një nivel të lartë pakënaqësie, duke e cilësuar të pamundur relativizimin e këtij realiteti përmes videove të shpërndara online.
Deputetja demokrate shprehet se protestat e zhvilluara në Tiranë dhe në qytete të ndryshme të botës dëshmuan, sipas saj, angazhimin e diasporës për çështjet që lidhen me zhvillimet politike dhe të ardhmen e Shqipërisë.
Zhupa akuzon mazhorancën se po përdor propagandën për të minimizuar jehonën e protestave, ndërsa shton se përpjekjet për të krijuar ndarje mes shqiptarëve janë një praktikë e njohur politike kur pushteti përballet me pakënaqësi të gjerë publike.
Ajo iu referua edhe deklaratave të kryeministrit Edi Rama në mbledhjen e grupit parlamentar socialist, duke pretenduar se pas thirrjeve të tij për një angazhim më të madh në rrjetet sociale, eksponentë të mazhorancës kanë intensifikuar publikimet në mbështetje të qeverisë.
Sipas Zhupës, videot me emigrantë që mbështesin qeverinë nuk ndryshojnë perceptimin e krijuar nga protestat e fundit dhe nuk adresojnë shqetësimet e ngritura nga qytetarët. Ajo thekson se zëri i protestuesve dhe mobilizimi i diasporës përbëjnë një tregues më domethënës të klimës politike sesa materialet e publikuara për qëllime politike.
Reagimi i plotë i Zhupës:
Ulërima e Ramës në mbledhjen e grupit parlamentar, se pse deputetët nuk po e mbrojnë mjaftueshëm në rrjetet sociale dhe nuk po fitojnë “luftën me algoritmin”, duket se ka dhënë efektin e saj. Sot janë lëshuar të gjithë me video e statuse nga më të ndryshmet, edhe pse nuk ka algoritëm që i shpëton nga gjykimi i shqiptarëve, të cilët ua kanë bërë tashmë vlerësimin.
Një nga përpjekjet më mediokre është publikimi i disa videove me emigrantë të lumtur me Ramën dhe kundër protestës. Ndërkohë, protesta madhështore e diasporës më 20 qershor në Tiranë, si edhe protestat e zhvilluara në qytetet kryesore të botës, treguan forcën reale të shqiptarëve kudo që jetojnë. Ato dëshmuan se pakënaqësia nuk është as e sajuar dhe as e izoluar, por një zë i gjerë qytetar që kërkon të dëgjohet.
Pikërisht për këtë arsye, përpjekjet për të nxjerrë disa video propagandistike me emigrantë në mbështetje të qeverisë nuk e zbehin dot realitetin. Ato nuk i japin përgjigje asnjë shqetësimi të ngritur nga protestuesit dhe nuk e fshehin dot faktin se mijëra shqiptarë kanë zgjedhur të ngrihen në mbrojtje të interesit publik.
Akoma më e rëndë është tentativa për t’i vënë shqiptarët kundër njëri-tjetrit, duke paraqitur mendimin e disave si kundërpeshë të revoltës së shumëkujt. Kjo është një metodë e vjetër e çdo pushteti që ndihet i kërcënuar nga zëri qytetar: përça për të sunduar.
Forca e protestës 22-ditore dhe, në veçanti, ajo e 20 qershorit, tregoi pikërisht të kundërtën e asaj që përpiqet të shesë propaganda: shqiptarët bashkohen kur ndihen të cenuar në të drejtat e tyre.
Kur qindra mijëra qytetarë flasin me zërin e protestës, askush nuk mund ta zëvendësojë atë realitet me disa video të përzgjedhura për konsum politik. Zëri i qytetarëve është gjithmonë më i fortë se propaganda.
