Kanë dalë në dritë detaje të reja tronditëse nga ngjarja e rëndë e ndodhur mbrëmjen e 23 korrikut në fshatin Frashër të Patosit, ku 26-vjeçarja Ermalinda Rama mbyti me tel të atin, Anesti Rama, 56 vjeç, në banesën familjare. Ngjarja që fillimisht u raportua si aksident, ka marrë një tjetër kthesë me arrestimin e një personi të dytë, i dyshuar si bashkëpunëtor në krim.
Arrestimi i 55-vjeçarit Çlirim Dogani
Ditën e sotme (26 korrik), policia e Fierit ka arrestuar shtetasin Çlirim Dogani, 55 vjeç, banues në fshatin Arapaj të Roskovecit, si bashkëpunëtor në vrasjen e Anesti Ramës. Hetuesit dyshojnë se Dogani kishte një lidhje intime me vajzën e viktimës dhe ndihmoi në ekzekutimin e tij. Burime konfirmojnë se vrasja dyshohet të jetë kryer me motiv hakmarrjeje dhe largimi nga presioni që i ati ushtronte mbi të bijën, duke e ndaluar të krijonte një marrëdhënie të re.
Sipas dëshmive dhe hetimeve paraprake, 26-vjeçarja ka rrëfyer se prej kohësh kishte konflikte të vazhdueshme me të atin për shkak të sjelljes së tij fanatike. Në dëshminë e saj para grupit hetimor, ajo ka pranuar krimin dhe ka treguar se Anesti Rama e mbante të izoluar, nuk e lejonte të vishej apo të dilte si moshataret dhe nuk i jepte para.
“S’po më linte të jetoja jetën time, çdo ditë më kontrollonte. Edhe për lidhjet ndërhynte. Kisha pasur tre fejesa, por ai i prishte të gjitha. S’mundesha më”, – ka deklaruar Ermalinda Rama.
Burime nga grupi hetimor thonë se 26-vjeçarja e ka goditur të atin në pjesët intime për ta rrëzuar, më pas Çlirim Dogani i cili dyshohet se ndodhej në vendngjarje e ka neutralizuar duke e mbajtur nga duart, ndërsa vajza e ka mbytur me tel në fyt. Policia dyshon se janë përdorur edhe sende të forta dhe mjete prerëse për ta goditur më tej trupin e viktimës, i cili më pas është dhunuar edhe pas vdekjes.
Nëna ndihmoi për të fshehur gjurmët
Pas krimit, bashkë me të ëmën, Valbona Rama, vajza u përpoq të inskenonte vrasjen si aksident, duke e veshur të ndjerin për varrim dhe njoftuar se kishte rënë në banjë. Por ekspertët mjeko-ligjorë zbuluan shenja të qarta dhune, që sollën zbulimin e së vërtetës. Nëna e autores u arrestua një ditë më parë për “veprime që pengojnë zbulimin e së vërtetës”.
Sipas raportimeve të deritanishme, vajza kishte krijuar një marrëdhënie dashurie me Çlirim Doganin, një burrë i martuar dhe baba i dy fëmijëve. Ata janë njohur në zonën e Roskovecit, ku punonin në serat e fermerëve, pasi motra e Ermalindës është e martuar atje. Mësohet se vajza udhëtonte shpesh drejt Suk 1, Suk 2 dhe Arapajt – zona ku jetonte dhe punonte Dogani.
Lidhja mes tyre është bërë objekt xhelozie dhe ndalese nga ana e babait, i cili nuk e pranonte raportin me një burrë të martuar. Pikërisht kjo pritet të jetë një nga shtysat kryesore të krimit. Megjithatë, Çlirim Dogani ka mohuar përfshirjen në ngjarje, duke deklaruar se në momentin e vrasjes ndodhej në fshatin e tij.
Kristiola Rama: Më thanë se kishte rënë në banjë dëgjova zërin e tij në telefon
Pas ngjarjes, ka folur për mediat dhe vajza e madhe e familjes, Kristiola Rama, e cila jeton në Itali me tre fëmijët e saj. Ajo ka treguar se motra e vogël e telefonoi për t’i thënë se babai kishte ndërruar jetë nga një rrëzim në tualet. Por në një moment, gjatë një bisede me të ëmën, Kristiola dëgjoi në sfond një zë mashkulli, që dyshoi se ishte i të atit ende gjallë.
“Më tha që babai kishte rënë. Kur e mora prapë në telefon, më tha që po e lanin. Dëgjova një zë… i thashë: babi është gjallë? Jo, më tha. Ishte tronditëse. Unë nuk dija gjë për ndonjë lidhje të motrës, me mua komunikonin rregullisht”, – rrëfeu Kristiola.
Fqinjtë dhe të afërmit kanë treguar për një histori të gjatë dhune dhe izolimi në këtë familje. Viktima flinte në kuzhinë, i ndarë nga gruaja dhe vajza. Shpesh shfaqej me shenja dhune në fytyrë, por nuk fliste për to. Ai punonte në një fermë blegtorale, ndërsa gruaja dhe vajza ishin të papuna.
Ky është rasti i dytë brenda dy viteve në Shqipëri ku një vajzë vret të atin, duke ngritur alarmin për çështjet e dhunës në familje dhe marrëdhëniet toksike brenda saj. Kujtojmë se në shkurt 2024, 19-vjeçarja Hygerta Meta vrau të atin në ShënaVlash dhe e groposi në oborr me ndihmën e vëllezërve.
Zbardhet vrasja e babait në Fier! Vajza e sulmoi, i dashuri e mbajti
Bashkëpunëtor në krimin horror/ Çlirim Dogani dyshohet se ishte në lidhje me vajzën e Anesti Ramës
Motra i mbyti babain me tel, vajza e madhe tregon si e mësoi ngjarjen
