Nga Boldnews.al
Sokol Sadushi dhe Arben Rakipi, dy prej “baballarëve” kryesorë të Reformës në Drejtësi, nuk lënë asnjë rast për të treguar se janë gati të përleshen me njëri-tjetrin, pasi të dy kanë hyrë në një betejë se cili prej tyre të rrëmbejë pjesën më të madhe të asaj që quhet “Drejtësi e Re”.
Këtë të Premte, Arben Rakipi, drejtor i Shkollës së Magjistraturës dhe njëkohësisht kryetar i Komisionit të posaçëm për ndryshimet në Kodin Penal, prezantoi ato që ai i konsideroi risi në legjislacionin përkatës.
Sokol Sadushi, në cilësinë e kryetarit të Gjykatës së Lartë, nuk i rezistoi tundimit për të sulmuar Arben Rakipin, duke u ankuar publikisht se kishte mbërritur në atë takim i papërgatitur, pasi nuk i ishte vendosur në dispozicion drafti i Kodit të ri Penal.
“Dua të theksoj se, deri në këtë moment, as unë si kryetar i Gjykatës së Lartë dhe as dhe komuniteti i profesionistëve nuk jemi njohur me versionin përfundimtar të projektit, që prezantohet sot. I vetmi dokument i bërë i aksesueshëm ka qenë një version i pjesës së përgjithshme i vitit 2023…”, deklaroi Sadushi.
Përplasja publike mes “çiftit të Reformës” ka nisur shumë më herët. Ajo doli në sipërfaqe, kur Rakipi, si kreu i Magjistraturës, përjashtoi nga Shkolla për kopjim në testime 5 studentë, dy prej të cilëve ishin njerëz shumë të afërt të Sadushit.
Kjo lëvizje e Rakipit u pa si një “hakmarrje” ndaj paraardhësit të tij në krye të Magjistraturës, Sadushit, i cili kritikoi më herët një proces pranimi të dështuar dhe me shumë pikëpyetje për studentët e rinj.
Rakipi ia vendosi fajin sistemit elektronik për atë situatë të dyshimtë, ndërkohë që Sadushi pretendonte se, përsa kohë ishte ai në krye të Magjistraturës, një rast i tillë dështimi nuk kishte ndodhur asnjëherë.
Natyrisht, kjo ishte pjesa e dukshme dhe më banale e konfliktit tashmë të hapur Rakipi-Sadushi.
Arsyet e vërteta duhen kërkuar tek pushteti që këta dy persona morën në dorë pasi realizuan “Reformën në Drejtësi”.
Secili prej tyre duket se po e shfrytëzon në maksimum pozitën që iu “dhurua” nga Partia Socialiste, megjithëse, si “ekspertë të lartë të Reformës në Drejtësi”, ata duhet të ishin përjashtuar nga e drejta për ofiqe.
Arben Rakipi, me kontrollin e provimit të pranimit në Shkollën e Magjistraturës, ka në dorë të gjithë armatën e re të gjyqtarëve dhe prokurorëve.
Gjithashtu, Rakipi kontroll edhe “programin vazhdues” të prokurorëve e gjyqtarëve në detyrë. Ky program është shumë i rëndësishëm për karrierën e magjistratëve dhe, një dështim në pjesëmarrje apo vlerësim, mund t’i pengojë ata që të rriten në shkallën e gjyqësorit.
Pra, si magjistratët e rij, ashtu edhe ata në detyrë, në një formë ose tjetër, janë në dorën e Arben Rakipit dhe ky i fundit, e ndjen erën e pushtetit të tij.
Nga ana tjetër është Sokol Sadushi. I ngritur në mënyrë të dyshimtë në krye të Gjykatës së Lartë, ai e kontroll me dorë të fortë këtë institucion dhe prej muajsh ka nisur revanshin për të vënën nën pushtetin e tij edhe Gjykatën Kushtetuese.
Pra, janë “dy gjela”, të cilët ethet për të thithur sa më shumë pushtet pranë vetes, i janë kundërvënë njëri-tjetrit, në formën më të shëmtuar të mundshme.
Lexo edhe:
Rama do lirojë të dënuarit me burgim të përjetshëm/ Rakipi: Njerëzit ndryshojnë në burg!
